لہور ہائی کورٹ نے شہباز شریف نوں باہر دے ملک جان دی اجازت دے دتی
لہور( پنجابی میڈیا گروپ) مسلم لیگ(ن)دے صدر شہباز شریف نے لندن جان دی تیاری پھڑ لئی تے لہور ہائی کورٹ نے اوہناں8ہفتیاں لئی باہر دے ملک جان دی اجازت دے دتی۔
ذرائع دے مطابق قومی اسمبلی وچ قائد حزب اختلاف شہباز شریف لئی غیر ملکی ایئر لائن توں کل دی بکنگ کروالی گئی۔ بلیک لسٹ تون نام نکلن اُتے اوہ کل ہی لندن نکل جان گے۔ شہبازشریف نے اپنے کیسان تے کمر دے ڈاکٹراں توں ٹائم لے رکھیا اے۔
جسٹس علی باقر نجفی نے شہباز شریف دا نام بلیک لسٹ توں نکلوان لئی درخواست اُتے سماعت کیتی۔ درخواست اُتے رجسٹرار آفس نے اعتراض کیتا تے آکھیا کہ درخواست گزار نے پہلاں متعلقہ فورم نال رجوع نہیں کیتا۔
عدالت نے شہباز شریف نوں فوری طور اُتے سدھ لیا جس اُتے اوہ عدالت وچ دوپہر نوں پیش ہوئے۔
فاضل جج نے سرکاری وکیل توں استفسار کیتا کہ شہباز شریف دا نام ای سی ایل شامل اے یا نہیں؟ سرکاری وکیل نے جواب دتا کہ اجے مینوںکنفرم نہیں ہوسکیا۔





















