شہباز شریف نوں بیرون ملک جان دی اجازت تے عملدرآمد دی عرضی تے اعتراض ختم

لہور( پنجابی میڈیا گروپ)ہائیکورٹ نے قومی اسمبلی وچ اپوزیشن لیڈر شہباز شریف نوں بیرون ملک جان دی اجازت دین دے فیصلے تے عملدرآمد دی عرضی تے اعتراض ختم کر دتا تے ایہنوں باقاعدہ طور تے سماعت لئی مقرر کرن دا حکم دے دتا۔ لہور ہائیکورٹ دے جسٹس علی باقر نجفی نے اپوزیشن لیڈر شہباز شریف دی عرضی تے اعتراض تے سماعت کیتی، شہباز شریف دے وکیلاں نے عدالت نوں دسیا کہ عدالت نے شہباز شریف نوں 8ہفتیاں لئی بیرون ملک جان دی اجازت دتی سی پر عدالتی حکم دے باوجود شہباز شریف نوں ایئر پورٹ تے روک لیا گیا جہڑا افسوسناک اے۔ لہور ہائیکورٹ دے جسٹس علی باقر نجفی نے عرضی دے ناقابل سماعت ہون دا اعتراض ختم کر دتا۔ عدالت نے ریمارکس دتے کہ شہباز شریف نوں علاج لئی اک وار بیرون ملک جان دی اجازت دتی سی جے عدالتی حکم نوں ہوا وچ اُڈایا گیا تے قنون اپنا راہ بنائے گا، عدالت نے رجسٹرار آفس نوں شہباز شریف دی مرکزی عرضی نوں سماعت لئی مقرر کرن دا حکم دے دتا۔

اپنا تبصرہ گھلو