کورونا ویکسین دے سائیڈ ایفکیٹس نہیں، غلط خبراں پھیلائی جا رہیاں نیں: ڈاکٹر فیصل سلطان
اسلام آباد( پنجابی میڈیا گروپ)معاون خصوصی برائے صحت ڈاکٹر فیصل سلطان نے آکھیا اے ملک وچ کسی ویکسین دی کمی اے نہ سائیڈ ایفکیٹس، سوشل میڈیا تے غلط خبراں پھیلائی جا رہیاں نیں۔ شہری اپنے آپ نوں رجسٹر کروان تے ڈوز لگوان۔ ڈاکٹر فیصل سلطان دا اسلام آباد وچ پریس کانفرنس کردیاں کہنا سی جنی زیادہ ویکسین لگے گی تے شہری نارمل زندگی وچ واپس آنا شروع ہو جان گے۔ حکومت لگاتار ویکسین خرید رہی اے۔ سوشل میڈیا دی خبراں نوں بغیر تصدیق اگے نہیں پھیلانا چاہیدا۔ جے کوئی سوال ہووے تے این سی او سی یاں ہیلتھ منسٹری دی ویب سائٹ تے کیتے جا سکدے نیں۔ معاون خصوصی آکھیا پاکستان وچ لگن والی ساری ویکسین محفوظ اے جد کہ ایسٹرازنیکا دے فوائد زیادہ نیں۔ دنیا دی مستند آرگنائزیشن نے ایہدی منظوری دتی اے۔ ایہ ویکسین 40ورھیاں توں ودھ عمر والیاں نوں لائی جا رہی اے۔ اوہناں دا کہنا سی جہناں نوں اک ڈوز سائنو فارم لگی اوہناں نوں دوسری وی اوہی لگے گی۔





















