پاکستان ریلوے دی تریخ وچ ہن تک کنے وڈے حادثے ہوئے ؟
لہور( پنجابی میڈیا گروپ)پاکستان ریلوے دی تریخ وچ ہن تک کئی وڈے حادثے ہوئے جناں وچ سیکڑاں بندے جان توں گئے تے ریلوے نوں کروڑاں دا نقصان ویہو ئیا۔
پاکستان ریلوے دی تریخ کئی وڈے حادثیاں نال بھری پئیاے، خطرناک ترین ٹرین حادثہ4جنوری1990نوں ہوئیا، جد پنوں عاقل دے نیڑے سانگی وچ ٹرین حادثے نال307افراد جان توں گئے۔
1953جھمپیرد ے نیڑے ٹرین حادثے وچ200افراد جاں بحق ہوئے، ایسی طرح1954وچ جنگ شاہی دے نیڑے ٹرین حادثے وچ60 قیمتی جاناں ضائع ہو گئیاں جد کہ ریلوے نوں کروڑاں دا نقصان ہوئیا۔
22 اکتوبر1969نوں لیاقت پور دے نیڑے ٹرین حادثے دا شکار ہوئی،80افراد جان توں گئے۔13جولائی2005نوں گھوٹکی دینیڑے تین ٹریناں آپس وچ ٹکرا گئیاں،120افراد جاں بحق ہوئے۔
جولائی2013وچ خان پور دے نیڑے ٹرین رکشے نال ٹکرا گئی،14افراد جان توں گئے۔2جولائی2015نوں گوجرانوالہ وچ خوفناک ٹرین حادثہ ہوئیا،19افراد زندگی دی بازی ہار گئے۔17نومبر2015بلوچستان وچ ٹرین حادثے نال20افراد لقمہ اجل بنے۔
3 نومبر2016نوںکراچی دے علاقے لانڈھی وچ دو ٹریناں آپس وچ ٹکرائیاں، نتیجہ وی خوفناک نکلیا،21افراد جاں بحق ہوئے۔31اکتوبر2019نوں ضلع رحیم یار خان وچ مسافر ٹرین وچ اگ لگن نال74افراد جان توںگئے۔
11جولائی2019نوں رحیم یار خان دے نیڑے اکبر ایکسپریس مال گڈی نال وجگئی، جس نال20مسافر جاں بحق تے60زخمی ہوئے۔سال2019پاکستان ریلوے دی تریخ دا بدترین سال ثابت ہوئیا،100توں ودھ حادثے ہوئے۔
ریلوے ریکارڈ دے مطابق سب توں زیادہ جون وچ20حادثے ہوئے، انسانی جاناں دے نال نال محکمہ ریلوے نوں وی کروڑاں روپے دا نقصان ہوئیا۔





















