پنجاب دی زراعت تباہ کرکے ملکی ترقی دیاں راہواں ڈَکن والے کون نیں؟
کالا باغ ڈیم نوں روکن لئی بھارت سنے ملک دشمن ایجنسیاں سازشاں کیتیاں تے ساڈے بعض لالچی سیاست داناں نوں وَرتیا،اج وی حالا ت اُنج ای نیں
لہور(بلال مدثربٹ)پنجاب نے ہمیشہ ملک دشمناں دیاں سازشاں دا سامنا بڑے ای حوصلے تے ہمت نال کیتا اے۔ایہنوں بدنصیبی کہو یاسیاست داناں دیاں مفاد پرست لوڑاں،ہمیشہ اونھاںپنجاب دا حق سیاسی لوڑاں لئی دوجے صوبیاں نوں وَنڈیا۔پاکستان کیوں جے زرعی ملک اے تے ایہدیاں پانی نال جڑیاں لوڑاں پوریاں کرن لئی جد 90 دی دہائی وچ جدکالاباغ ڈیم بناون لئی کوششاں شروع ہوئیاں تے دشمن ملکاں دیاں سازشاں وی شروع ہو گئیاں۔خاص طور اُتے بھارت ولوں پاکستان وچ اجہیاں آوازاں نوں تحریک دِتی گئی جیہڑیاں کالاباغ ڈیم دی مخالفت وچ چکیاں جارہیاں سن۔ایس دوران اک بنھے تے سندھو دیش تے دوجے بنھے پختونستان لئی وی سازشاں شروع ہوگئیاں۔ایہہ گلاں کرن والے نہ تے عام لوکائی نال جڑے سن تے نہ ای اونھاں دا تعلق ایس دھرتی نال سی۔سارا کھیڈ باہر بہہ کے کھیڈیا گیا جنھوں بھارتی تے اسرائیلی ایجنسیاں دی اشیرواد حاصل سی۔بھاویں ایہہ سازشاں ایہنیاں تگڑیاں نہیں سن پر فیر وی پاکستان مخالف بین الاقوامی میڈیا نے ایہناں نوںبہت ہوا دتی۔ایہہ وی نوے دا ای دھاکا سی جد سنگا پور دی طرز اُتے کراچی نوں وکھ کرن دیاں گلاں سامنے آئیاں۔ایہہ ساریاںسازشاں ساڈی فوج تے حساس اداریاں اپنے عوام نال رل کے مکائیاں تے دشمناں نوں ذلالت تو وکھ کچھ نہ لبھا۔اج ملک توڑن دیاں گلاں اُنج اُچی آواز وچ تے نہیں ہورئیاں پر فیر وی اجیہیاں سازشاں ہورئیاں نیں جیہڑیاں نہ تے ملکی مفاد وچ نیں تے نہ ای موجودہ حالات اندر ایہناں نوں نظر انداز کرنا چاہیدا اے۔تسیں پاکستان دشمن طاقتاں دیاں سازشاں دا اندازہ ایتھوں کر سکدے او کہ کچھ عرصہ پہلاں جیہڑی گل بلوچستان چہ خرابی پیدا کرن والے لوک کررہے سن فیر اوہی منظور پشتین تے اوہدے سنگیاں کرنی شروع کردِتی تے ہن اوسے سکرپٹ نال رلدا ملدا سکرپٹ سانھوں پیپلز پارٹی ولوں سنن نوں لبھ رہیا اے۔جے کر چنگی طرح باریکی نال جائزہ لئیے تے سمجھ آوندی اے کہ ایہہ سارے دے سارے اکو جیہیاں گلاں ای کر رہے نیں،اوہو فوج مخالف پروپیگنڈا تے اوہوپنجاب نال دشمنی۔اوہو ضرورتوں ودھ پانی لے کے وی پنجاب مخالف بیان کہ ساڈیاں زمیناں بنجر کیتیا ں جارہیاں نیں تے اوہوبے تُکیاں الزام تراشیاں کے پنجاب سارے وسائل اُتے قبضہ جمائی بیٹھا اے۔اندازہ کرو کہ جیہڑا کالاباغ ڈیم پنجاب دے نال نال سندھ تے کے پی دیاں بنجر زمیناں نوں وی آباد کر کے زرعی ترقی دے در کھول سکدا سی اونھوں روکن دے نال نال ہن ایہہ پروپیگنڈا وی کیتا جارہیا اے کہ سندھ دی بربادی وچ پنجاب دا ہتھ اے،حالانکہ پنجاب دی زراعت نوں اک سازش نال برباد کیتا گیا جیہدے کردار ایہو قوم پرست سیاست دان نے جیہڑے ہُن پنجاب مخالف گلاں کر رہے نیں۔ایہہ اوہو ای لوک نیں جیہڑے اک بنھے پنجاب بارے زہر اُگل رہے نیں تے دوجے پاسے حساس اداریاں نوں آزادی اظہار رائے دے ناں اُتے بدنام کرن دیاںسازشاں رچا رہے نیں تاں جے محب وطن حلقے ایہناں دی بلیک میلنگ دا شکار ہوکے بیک فٹ اُتے چلے جان۔ساڈے اداریاں سنے حکومت دے اہم محکمیاں نوں ایہناں سازشاں دے تانے بانے ویکھنے چاہی دے نیں،ویکھیا جاوے کہ ایہناں سازشاں دے پچھے کون اے۔اوہ کیہڑیاں طاقتاں نیں جیہڑیاں ریاست نوں کمزور کرن لئی پورا ٹِل لارہئیاںنیں۔ایہہ وی غور طلب اے کہ ایہہ سارے دا سارا سکرپٹ اکو جیہا کیوں اے؟صاف نظر آرہیا اے کہ ایہدے پچھے وی اوہو ای دشمن اے جیہڑا صوبائی تعصب نوں ہوا دے کے پاکستان نوں کمزور بناونا چاوہندا اے۔پنجاب دے کساناں دا حق مار کے اونھاں دیاں فصلاں برباد کر کے ملکی ترقی دیاں راہواں کھوٹیاں کرنا چائوہندا اے۔





















