حکو مت اخباری صنعت دی سرپرستی کرے: مدثر اقبال بٹ، پنجاب حکومت آزاد صحافت اُتے یقین رکھدی اے: ثمن رائے
اخباری صنعت نوں درپیش مسئلیاں دے حل لئی این پی اے تے قلم مزدوراں دے وفد دی ڈی جی پی آر ثمن رائے نال بیٹھک، آزاد صحافت دی حوصلہ افزائی اُتے اتفاق
لہور(نمائندہ خصوصی) چیئرمین این پی اے دی اگوائی وچ اخبار مالکان تے کامیاں دی ترجمانی کرن والے وفد نے ڈی جی پی آر ثمن رائے نال ملاقات کیتی تے اوہناں نال اخباری صنعت نوـں درپیش مسئلیاں اُتے وچار سانجھے کیتے۔ مدثر اقبال بٹ ہوراں آکھیا کہ اج اخباری صنعت تے آزاد صحافت نوں برابری دی بنیاد اُتے حکومتی سر پرستی دی لوڑ اے تاں جے ایس صنعت نال جُڑے لکھاں کامیاں دا روزگار محفوظ رہ سکے ۔ اونھاں بزدار سرکار دیاں پالیسیاں سراہندیاں آکھیا کہ حکومت ولوں جاری کردہ میڈیا پالیسی 2020 اُتے جیہڑے تحفظات عام اخبار نویس نوں سن اوہناں نوں دور کرن لئی کوششاں قابل تحسین نیں۔حکومت ولوں علاقائی اخباراں نوں اشتہاراں دا اجرا قابل ستائش اے۔ایس موقعے اُتے این پی اے پنجاب دے صدر شہزاد شیرازی د ا آکھنا سی کہ ڈی جی پی آر ہورا ں ولوں حکومتی نمائندگی بہت بھلے ڈَھنگ وچ کیتی جا رہی اے۔ثمن رائے ہوراں نہایت پروفیشنل طریقے نال حکومت تے اخبار نویساں وچ غلط فہمیاں نوں دور کیتا تے اپنا فرض خوبی نال نبھایا۔
ڈی جی پی آر ثمن رائے ہوراں دا کہنا سی کہ پنجاب حکومت آزادی صحافت اُتے یقین رکھدیاں اخبار نویساں دیاں لوڑاں توں وی چنگی طرح واقف اے۔ اسیں وزیر اعلیٰ پنجاب جناب عثمان بزدار ہوراں دی راہنمائی وچ اخباری صنعت نوں آزاد تے مضبوط بنائون اُتے یقین رکھنے آں۔ اونھاں ایہ وی آکھیا کہ این پی اے نے ہمیشہ قلم مزدوراں لئی آواز چُکی اے جنھوں اسیں سراہن دے نال نال ایہناں دے تحفظات وی دور کرن دی پوری کوشش کیتی۔ ثمن رائے ہوراں مزید آکھیا کہ سردار عثمان بزدار ہوراں کدے وی اخبار نویساں دی تنقید دا بُرا نہیں منایا ، اوہ مثبت تنقید دے قائل تے سچ آکھن والیاں دی حوصلہ افزائی اُتے یقین رکھدے نیں۔ ایس موقعے اُتے جنرل سیکرٹری پریس کلب بھلوال تصور شیرازی تے قمر عمران ملک ہوری وی موجود سن جنھاں حکومت تے اخباری صنعت وچکار پُل بنن اُتے ثمن رائے ہوراں دی سیوا نوں سراہیا۔





















