سٹاک مارکیٹ وچ تیزی،امریکی ڈالر23پیسے مہنگا

لہور( پنجابی میڈیا گروپ)ملک بھر وچ اک وار فیر روپے دے مقابلے وچ امریکی ڈالر دی قدر ودھن لگی، امریکی کرنسی ہور23پیسے مہنگی ہو گئی۔
اسٹیٹ بینک آف پاکستان دی سماجی رابطے دی ویب سائٹ ٹویٹر اُتے جاری لسٹ دے مطابق ایس ہفتے دے چوتھے کاروباری دناں دے دوران انٹر بینک وچ روپے دے مقابلے وچ امریکی ڈالر ہور23پیسے مہنگا ہو گئیا جس توں بعد امریکی ڈالر دی قیمت155روپے69پیسے توں ودھ کے155روپے92پیسے ہو گئی اے۔
دُوجے پاسے سٹاک مارکیٹ وچ معاشی حوالے چنگیاںخبراں دے اثرات ساہمنے آن لگے،چوتھے کاروباری دن دے دوران100 انڈیکس وچ473.87پوائنٹ دی تیزی ویکھی گئی جس دیب باعث دوبارہ48ہزاردی نفسیاتی حد بحال ہو گئی تے انڈیکس48251.49پوائنٹ دی سطح اُتے پہنچ کے بند ہوئیا۔
پورے کاروباری دناں دے دوران کاروبار وچ0.99فیصد دی بہتری ویکھی گئی جدکہ29کروڑ65لکھ71ہزار812شیئراں دا لین دین ہوئیا۔ زبردست تیزی دے باعث سرمایہ کاراں نوں ارباں روپے دا فائدہ ہوئیا۔