موجودہ بجٹ وچ معاشرے دے ہرطبقہ لئی اُمید دی کرن اے،وزیراعظم عمران خان
اسلام آباد( پنجابی میڈیا گروپ)وزیراعظم عمران خان نے آکھیا اے کہ پاکستان دی معیشت ناصرف مضبوط بلکہ ترقی ول جا رہی اے موجودہ بجٹ ترقی دا بجٹ اے، موجودہ بجٹ وچ معاشرے دے ہر طبقہ لئیاُمید دی کرن اے، بجٹ دے اہم نکات بارے عوام نوں بھرپور آگاہی فراہم کیتی جائے۔ایہ گلاں اوہناں نے پیر نوں اپنی زیر صدارت پارٹی ترجماناں دے اجلاس نال خطاب کردئیاں کتیاں۔وزیراعظم آفس دے میڈیا ونگ ولوں جاری بیان دے مطابق اجلاس وچ وفاقی وزیراں،معاونین خصوصی،پارٹی رہنماواں تے ترجماناں رلت کیتی۔اجلاس وچ ملکی صورتحال خصوصاََ حکومت ولوں پیش کیتا جان والاعوامی ترقیاتی بجٹ،بجٹ وچ عوام نوں دتے جان والے ریلیف تے خصوصا معاشی ترقی دے عمل نوں تیز کرن دے حوالے نال اقدامات زیر غور آئے۔پارٹی رہنماواں نے اک متوازن، عوام دوست تے معاشرے دے ہر طبقے لئی مثبت بجٹ پیش کرن اُتے وزیرِاعظم تے حکومتی معاشی ٹیم نوں مبارکباد دتی۔وزیرِاعظم عمران خان نے اجلاس نال خطاب کردئیاں آکھیا کہ کورونا دے دور وچ جد عالمی سطح اُتے ہر معیشت نوں سخت دھچکا لگیا تے معاشی مسائل پیدا ہوئے، اوتھے پاکستان نے کامیاب حکمت عملی نال معاشی سفر طے کیتا اے۔اوہناں نے آکھیا کہ موجودہ بجٹ ترقی دا بجٹ اے جس دا مقصد معاشی استحکام نوں نہ صرف ہور مضبوطکرنا اے بلکہ معیشت دے اہم شعبیاں زراعت، انڈسٹری، ہائوسنگ وغیرہ ورگے اہم شعبیاں نوں فروغ دینا اے۔وزیرِاعظم نے موجودہ حکومت دے اہم اقدامات دی نشاندہی کردئیاں ہوئیاں آکھیا کہ کامیاب جوان پروگرام،صحت کارڈ،ٹین بلین ٹری سونامی،سائنس تے ٹیکنالوجی نوں فروغ، تخفیف غربت تے روزگار دے موقعے پیدا کرن ورگے پروگراماں اُتے خصوصی توجہ دین دا مقصد ملک نوں درپیش چیلنجاں اُتے موثر طریقے نال قابو پانا ہے۔





















