پنجاب دا2653ارب روپے دا بجٹ پیش،تنخواہواں ودھ گیاں،نوا ٹیکس نہ لان دا فیصلہ
اسلام آباد( پنجابی میڈیا گروپ)پنجاب اسمبلی دے خصوصی اجلاس وچ صوبے دا2ہزار653ارب روپے دا بجٹ پیش کر دتا گیا اے۔ حکومت نے عوام نوں ریلیف دیندیاں ہوئیاںکوئی نوا ٹیکس نہیںلیا جدکہ سرکاری ملازماں دیاں تنخواہواں10فیصد ودھان دا فیصلہ کیتا اے۔ ترقیاتی پروگرام لئی560ارب روپے رکھ دتے گئے۔صوبائی وزیر خزانہ ہاشم جواں بخت دا بجٹ پیش کردئیاں ہوئیاں آکھنا سی کہ پنجاب دا بجٹ ترقی تے خوشحالی دا ضامن ہوئے گا۔ کورونا دے سامنے وڈے وڈے ملک گھٹنے ٹیکن اُتے مجبور ہوئے لیکن اسیں بیماری دے دوران غریب عوام نوں ریلیف دتا۔ اج معیشت بہتری ولجا رہی اے۔ پاکستان دی سٹاک مارکیٹ تریخ دی اُچی ترین سطح اُتے پہنچ چکی اے۔ہاشم جواں بخت دا بجٹ تقریر وچ کہنا سی کہ صوبائی محصولات دا ہدف359ارب روپے رکھیا گیا اے۔ ایس دے علاوہ صحت لئی370ارب روپے رکھے جا رہے نیں۔ یونیورسل ہیلتھ انشورنس پروگرام لئی80ارب روپے رکھے گئے نیں۔اوہناں دا کہنا سی کہ لہور وچ14ارب روپے نال اک ہزار بستر دے ہسپتال دی تعمیر شروع ہو گی۔14شہراں وچ ساڑھے3ارب دے جدید ٹراما سینٹر قائم کیتے جان گے۔پنجاب اسمبلی وچ بجٹ تقریر دا آغاز ہندیاں ہی اپوزیشن نے شدید احتجاج شروع کر دتا۔ وزیر خزانہ مخدوم ہاشم جواں بخت نے تقریر شروع کیتی تے اپوزیشن نے نعرہ بازی شروع کر دتی تے بجٹ نامنظور دے نعرے لگائے جدکہ پلے کارڈ پھڑکے احتجاج کیتا۔لیکن ہاشم جواں بخت نے اپنی تقریر جاری رکھی۔ اوہناں داکہنا سیکہ تعلیم دا مجموعی بجٹ442ارب روپے رکھیا گیا اے۔ سیالکوٹ وچ17ارب روپے دی لاگت نال انجینئرنگ یونیورسٹی قائم کیتی جا رہی اے۔ پنجاب دے25فیصد سکولاں نوں اپ گریڈ کیتا جا رہیا اے جدکہ صوبے وچ ایس سال7نویاں یونیورسٹیاں قائم کیتیاںجا رہیاں نیںایس دے علاوہ40ہزار طالب علماں نوں فنی تربیت دتی جائے گی۔صوبائی وزیر نیآکھیا کہ36ضلعیاں وچ ترقیاتی سکیماں دا جال ویچھایا جا رہیا اے۔ ترقیاتی منصوبیا ں لئی28ارب30کروڑ رکھے جا رہے نیں۔ لہور وچ الیکٹرک بساں لئی60کروڑ روپے رکھے گئے نیں۔ایس دے علاوہ لہور شہر دے ترقیاتی منصوبیاں لئی28ارب30کروڑ رکھے جا چکے نیں جد کہکئی خدمتاں اُتے ٹیکس دی شرح گھٹ کر کے16فیصد کیتی جا رہی اے۔صوبائی بجٹ وچ پین دے صاف پانی لئی پنجاب دیاں16تحصیلاں وچ86ارب دے فنڈز مختص کیتیگئے نیں۔ ہاشم جواں بخت دا کہنا سی کہ محکمہ زراعت دے شعبے لئی31ارب50کروڑ رکھے جا رہے نیں۔ کسان کارڈ لئی4ارب تے امپورومنٹ آف واٹر کورس لئی5ارب روپے رکھے گئے نیں، نہری نظام دی بہتری لئی55ارب رکھے جا رہے نیں۔وزیر خزانہ نے گریڈ1توں19تک دے ساڑھے7لکھ ملازماں لئی25فیصد سپیشل الائونس جدکہ سرکاری ملازماں دیاں تنخواہواں تے پنشن وچ10فیصد ودھان دا اعلان وی کیتا۔ ایس دے علاوہ گھٹ دیہاڑی داردی20ہزار کیتی جا رہی اے۔اوہناں دا کہنا سی کہ لائیو سٹاک اینڈ ڈیری ڈویلپمنٹ لئی5ارب روپے، جنگلی حیات دے تحفظ لئی اک ارب روپے جدکہ معذور افراد دی معاونت لئی بجٹ وچ10کروڑ روپے رکھے جا رہے نیں۔





















