ملکی معیشت اُتے 31خانداناں دا قبضہ،سٹاک مارکیٹ دا اتار چڑھائوبے معنی،فائدے خاص گروہ تیکر محدود
معاشی صورت حال نوں عموماًسٹاک مارکیٹ دی تیزی مندی نال جوڑیا جاندا اے،پاکستان سنے حکومتاں سٹاک مارکیٹ نوں بنیاد بناکے اپنی کارکردگی نوں ودھا چڑھا کے پیش کردیاں نیں
لہور(اُچیچی رپورٹ)پاکستانی میڈیااتے اکثر سٹاک مارکیٹ وچ تیزی دے رجحان یا مارکیٹ ڈِگ پین دیاں خبراں ہندیاں نیں جس نال کجھ لوگ ایہ سمجھدے نیں کہ معیشت بہتر یا گراوٹ دا شکار ہو رہی اے۔ حکومت ولوں وی سٹاک مارکیٹ دی کارکردگی نوں اپنی بہتر معاشی پالیسیاں داثمر قرار دتا جاندا اے۔پرکیہ وجہ اے کہ سٹاک مارکیٹ وچ تیزی نال نہ ملک دی مجموعی معاشی صورتحال بہتر ہندی نظر آوندی اے تے نہ ای لوکائی دی حیاتی وچ وڈی تبدیلی دا سبب بندی اے۔پاکستان انسٹی ٹیوٹ آف ڈیویلپمنٹ اکنامکس(پائیڈ)دے وائس چانسلر ڈاکٹر ندیم الحق تے امین حسین نے ایس سوال دا جواب لبھن دی کوشش کیتی اے تے اک حیران کن نتیجے اُتے پہنچے نیں۔اونھاں دی مرتب کیتی رپورٹ وچ آکھیا گیا اے کہ کارپوریٹ گورننس دا ضابطہ بورڈ آف ڈائریکٹرز نوں پابند کردا اے کہ اوہ ٹرسٹی دی حیثیت نال سارے سرمایہ کاراں دے مفادات دی حفاظت کرن،بھاویں اوہ وڈے سرمایہ کار ہون یا چھوٹے۔پر اوہناں ڈائریکٹراں دا تعلق سپانسر خانداناں(وڈے کاروباری اداریاں)نال ہندا اے تے اوہ اکوویلے کئی بورڈاں وچ خدمت انجام دیندے نیں۔ ایس لئی اوہ سپانسراں دے مفاداں دا تحفظ کردے نیں،نہ کہ چھوٹے تے اقلیتی سرمایہ کاراں دے مفاد دا۔اِنج کاروبار اُتے ملک دے چند تگڑے خانداناں دی اجارہ داری برقرار رہندی اے۔
ایس کھوج دے نتیجے نصف صدی پرانے اک انکشاف دی یاد تازہ کردے نیں۔ ملک دے پہلے فوجی حکمران ایوب خان دے دور حکومت دے10ورھے پورے ہون اُتے جد 10سالہ اقتدارداجشن ملک گیر سطح اُتے منایا گیا تے اوس دا اختتام اک ‘دھماکہ خیز انکشاف’اُتے ہوئیا۔ایوب حکومت دے ترجمان تے سیکرٹری اطلاعات الطاف گوہر نے اپنی کتاب’ایوب خان: فوجی راج دے پہلے10سال وچ لکھیا اے کہ حکومت دے چیف اکنامسٹ ڈاکٹر محبوب الحق نے انکشاف کیتاسی کہ قومی معیشت ایس ویلے 22خانداناں دی پکڑ وچ اے۔ ایہہ انکشاف قومی زندگی وچ اک دھماکے دی طرح سنیا گیا تے سیاسی زندگی اُتے ایس دے ڈُنگے اثرات مرتب ہوئے، جنھاں دا نمایاں ترین پہلو ایہہ سی کہ ایہ معاملہ حکومت مخالف تحریک وچ بنیادی ایجنڈے دی حیثیت اختیار کر گیا۔پاکستان انسٹی ٹیوٹ آف ڈیویلپمنٹ اکنامکس(پائیڈ)دی حالیہ تحقیق ایس تسلسل دی کہانی بیان کردی اے جس توں معلوم ہندا اے کہ ایہناں50سالاں دے دوران ملک دے کاروباری منظرنامے اُتے نو ہور خانداناں دا اضافہ ہوئیا۔پائیڈ دی ایس رپورٹ دے مصنفین دے مطابق ایہہ اک کھلی حقیقت اے کہ پاکستان وچ سٹاک مارکیٹ چھوٹی اے جس وچ آئی پی او وی بوہت گھٹ نیں تے مارکیٹ غیر مستحکم اے۔ایس لئی اک خاص طبقہ ہمیشہ توں اپنے مفادات حاصل کردااے۔رپورٹ وچ ایس صورت حال نوں اشرافیہ دا اک محدود ‘کلب’قرار دتا گیا اے کیوں جے رپورٹ دے مطابق سٹاک مارکیٹ حقیقت وچ کجھ وڈے سرمایہ کاراں دی گرفت وچ آ چکی اے یعنی ایس وچ نویں لوکاں لئی مواقع محدود ہو چکے نیں۔مصنفین پچھلی نصف صدی دے کاروباری اُتار چڑھا تے رجسٹرڈ کاروباری اداریاں دی ساخت دے جائزے توں بعد ایس حیران کن نتیجے اُتے پہنچے نیں کہ سٹاک مارکیٹ وچ متحرک ملک دیاںکئی کاروباری کمپنیاں اپنے ڈائریکٹراں دے ذریعے باہم منسلک نیں۔کھوج دے مطابق اوہناں کمپنیاں وچ خود مختار ڈائریکٹراں دی آسامیاں 220سن جناں وچوںصرف دو خود مختار ڈائریکٹراک فرم دے حصے وچ آندے نیں۔ ایس دے مقابلے وچ14فیصد ڈائریکٹر دو بورڈ آف ڈائریکٹر زوچ،چھ فیصد تین بورڈ آف ڈائریکٹر وچ جدکہ تن فیصد ڈائریکٹر چار توں پنج بورڈ آف ڈائریکٹر زوچ اک ٹائم کم کردے نیں۔ایس رپورٹ وچ چار انج دے ممتاز کاروباری تے ٹیکنوکریٹس دی نشان دہی وی کیتی گئی اے جیہڑے اک ویلے17کمپنیاں وچ ڈائریکٹر دی حیثیت نال کم کر رہے سن۔ڈائریکٹر شپ دے ذریعے قریبی نیٹ ورک وچ منسلک اینھاں کمپنیاں دے مقابلے وچ صرف15اجہیاں کمپنیاں ساہمنے آئیاں جیہڑیاں ایس نیٹ ورک وچ شامل نہیں سن۔ ایسے طرح ہور اعداد و شمار وی توجہ طلب نیں۔ تحقیق دے مطابق صرف297 ڈائریکٹرز کارپوریٹ منظر رکھدے نیں،148دی تعیناتی حکومت نے کیتی،32ڈائریکٹرز سابق بیوروکریٹ تے22فوج دے سابق اعلی افسر نیں۔رپورٹ وچ ایہ وی دسیا گیا اے کہ اینہاں ڈائریکٹراں وچوں اکثریت دا تعلق کراچی نال تے دُوجے نمبر اُتے لہور توں اے، ایسے طرح ایس وچ عورتاں دی نمائندگی وی نہ ہون دے برابر اے جیہڑا’قنون دی کھلی خلاف ورزی’اے۔تحقیق وچ دسیاگیا کہ ایہناں کمپنیاں وچکار رابطیاں دا مضبوط جال اطلاعات دے آزادانہ تبادلے دے غیر معمولی مواقع فراہم کردا اے جس نال ایس کاروباری کلب دی معیشت مسلسل ترقی کردی اے۔
ہُن سوال ایہہ پیدا ہندا اے کہ کس طرح ممکن ہو جاندا اے کہ حکومت دے قنون دی موجودگی وچ کجھ کاروباری ادارے پورے ملک دے کاروبار نوں اک محدود کلب وچ سمیٹ کے رکھ دین؟ممتاز ماہر معیشت ڈاکٹر شاہد حسن صدیقی نے ایس سوال دے جواب وچ آکھیا کہ پاکستان وچ بیشتر معاشی پالیسیاں طاقتور طبقے دے دبا وچ بنائیاں جاندیاں نیں تے ایس مقصد دی راہ وچ جے کوئی رکاوٹ ہوئے تے حکومت تے سرکاری ادارے سارے مالی بھارلوکائی اُتے منتقل کر کے کسے نویں قنون سازی وچ وی کوئی عار محسوس نہیں کردے۔ڈاکٹر شاہد حسن صدیقی دے مطابق پاکستان دے22کروڑلوکاں دے معاشی مفادات دے خلاف کجھ طبقیاں دا اک گٹھ جوڑ اے۔ڈاکٹر شاہد حسن صدیقی دا کہنا اے کہ ایہ کلب معیشت دے مختلف شعبیاں دے بااثر افراد اُتے مشتمل اے جس وچ وڈے تاجر،درآمد تے برآمد کنندگان،ذرائع ابلاغ دا اک حصہ،کئی مذہبی طبقات، اقتصادی ٹیکنوکریٹس تے نجکاری دے ناں اُتے کوڈھیاں دے مُل قومی اثاثیاں اُتے قبضہ جمان والے شامل نیں۔





















