نواز شریف دیاں جائیداداں نیلامی توں روکن دیاں درخواستاں رَد
اسلام آباد( پنجابی میڈیا گروپ)اسلام آباد ہائی کورٹ نے نواز شریف دیاں جائیداداں دی نیلامی رکوان دیاں درخواستاں مسترد کردتیاں۔
توشہ خانہ ریفرنس وچ نواز شریف دیاں جائیداداں دی نیلامی رکوان دیاں درخواستاں وچ اہم پیش رفت ہوئے گی۔ چیف جسٹس اطہر من اللہ تے جسٹس عامر فاروق اُتے مشتمل ہائی کورٹ دے بنچ نے توشہ خانہ ریفرنس وچ نواز شریف دیاں جائیداد نیلامی دے فیصلے دے خلاف درخواستاں دی سماعت کیتی۔
درخواست گزاراں دے وکیل قاضی مصباح الحسن ایڈوکیٹ نے دلائل دتے کہ احتساب عدالت نے نواز شریف دی جائیداد نیلامی دا حکم دتا سی،لیکن نواز شریف دی پراپرٹی وچ اوہناں تیناں درخواست گزاراں دے حصے نیں،شیخوپورہ،اپر مال لہور، کنال روڈ اراضی درخواست گزاراں نے خریدی مگر قبضہ اجے وی نواز شریف کول اے۔
چیف جسٹس اطہر من اللہ نے پُچھیا کہ درخواست گزار اراضی نوں اپنی پراپرٹی سمجھ رہے نیں مگر کوئی ثبوت پیش نہیں کیتا،اوہناں پراپرٹیاں دا جیہڑا ایگریمنٹ کیتا اے،ایس اُتے کوئی دستخط نہیں؟وکیل نے آکھیا کہ ایہ کیس سول عدالت دا اے احتساب عدالت دا دائرہ اختیار نہیں کہ اوہ کسی دی پراپرٹی نوں نیلام کرے۔





















