اج پوری دُنیا وچ موسیقی دا عالمی دن منایا جارہیا اے
لہور( پنجابی میڈیا گروپ) اج پوری دُنیا وچ اج موسیقی دا عالمی دن منایا جا رہیا اے،ایس دن نوں منان دا مقصد دُنیا دے لوکاں نوں موسیقی دے ذریعے امن،محبت تے بھائی چارے دی زنجیر وچ بنھن دی اک خوبصورت کوشش اے۔ورلڈ میوزک ڈے دا آغاز29ورھے پہلاں فرانس دے شہر پیرس تون ہوئیا،موسیقی دی روایت برصغیر وچ وی بہت پرانی اے تیکلاسیکل موسیقی دے علاوہ غزل،گیت،فوک تے پلے بیک سنگنگ وغیرہ وی ایتھے دے لوکاں وچ انتہائی مقبول اے۔ موسیقی روح دی غذا وی سمجھی جاندی اے،امیر خسرو،تان سین،نصرت فتح علی خان،نازیہ حسن سنے ہور گلوکاراں نے فن موسیقی نوں بام عروج تک پہنچایا۔برِصغیر وچ موسیقی نے مغلیہ دور توں بہت پہلاں عروج حاصل کر لیا سی،امیرخسرو توں بعد تان سین تے بیجوباورا،کے ایل سہگل تے مختار بیگم نے ماضی قریب تک سینکڑاں کلاسیک گائیک ایس فن دے امین بنے۔قیام پاکستان توں بعد موسیقی دے شعبہ وچ نصرت فتح علی خان،نور جہاں،مہدی حسن،فریدہ خانم،اقبال بانو،خورشید بیگم،غلام علی،پرویز مہدی،احمد رشدی تے مسعود رانا ورگے ناماں نے لازوال گیت تخلیق کیتے تے گائے۔فوک موسیقی وچ عالم لوہار،شوکت علی،ریشماں،پٹھانے خان،عابدہ پروین،سائیں اختر،عارف لوہار تے ہوراں نے ایس فن نوں عروج اُتے پہنچایا- موسیقی دی اک ہور جِت قوالی وی اے جس دا سب توں درخشاں ستارے استاد نصرت فتح علی خان سن،غلام فرید صابری تے عزیز میاں سنے کئی دُوجے قوالاں نے وی اپنی گائیکی نال دُنیا بھر وچ اپنے چاہن والے پیدا کیتے۔ موجودہ دور وچ پوپ موسیقی اندرعلی ظفر،عاطف اسلم،عمیر جسوال تے مومنہ مستحسن وغیرہ مقبول نام نیں۔





















