پنجاب سیوَک سانجھ“ دا احتجاجی مظاہرہ”

20/جون 2021ء نوں ”پنجاب سیوَک سانجھ“ وَلُّوں ممبر قومی اسمبلی شیخ روحیل اصغر دے گالھاں نوں پنجاب دا کلچر کہن والے بیہودہ تے جاہلانہ بیان دے خلاف نیشنل پریس کلب اسلام آباد دے سامنے بھرواں احتجاجی مظاہرہ کیتا گیا. جس وِچ پنجابی دانشوراں، لکھاریاں، سیوَکاں، صحافیاں، پنجابی سٹوڈنٹس تے سول سوسائٹی دے لوکاں دی وَڈی گنتری نے رَلت کیتی.
مظاہرین نے شیخ روحیل اصغر وَلُّوں پنجاب دے کلچر بارے توہین آمیز تے بیہودہ ریمارکس اُپر شدید نندیا کردیاں ایہنوں پوری پنجابی قوم دی توہین قرار دتا. اور شیخ روحیل اصغر وَلُّوں فوری معافی دی منگ کیتی.
مظاہرے دے رَلتیاں نے پنجابی کلچر دی توہین دے خلاف شدید نعرے بازی کیتی.
مظاہرے نال چراغ الدّین وانہ، ڈاکٹر افلاک چیمہ، آغا نسیم عباس، راجہ وسیم جنجوعہ، ریاست علی ثانی، سٹوڈنٹ لیڈر چودھری عبدالمنیب رندھاوا تے سینیئر صحافی چودھری اسحاق وِرک نے خطاب کیتا.
بعد وِچ مظاہرے دے آگوواں نے میڈیا نال گل بات وِچ آکھیا، کہ دنیا دی ہر زبان وِچ گالھاں دا ذخیرہ موجود ہوندا اے، لیکن کسے زبان یا کلچر نوں گالھاں دی زبان یا کلچر کہنا صرف جہالت اور بغض دی غمازی کردا اے. پنجاب دنیا دی عظیم سندھو تہذیب دا مرکزی وارث اے. اور 7000 سالہ شاندار تہذیبی تے ثقافتی ورثہ رکھدا اے. شیخ روحیل اصغر وَلُّوں پنجاب دے کلچر بارے بیہودہ گفتگو پوری پنجابی قوم دی توہین اے.
مظاہرے دے آگوواں نے منگ کیتی، کہ شیخ روحیل اصغر اپنے توہین آمیز تے بیہودہ ریمارکس اُپر پوری پنجابی قوم توں فوری معافی منگے. دوجی صورت وِچ پنجاب دے سب نِکے وَڈے شہراں قصبیاں وِچ احتجاجی مظاہریاں دا سلسلہ شروع کیتا جائے گا.

سیکریٹری اطلاعات
”پنجاب سیوَک سانجھ“

اپنا تبصرہ گھلو