معروف کہانی کار تے پنجابی سیوک امین ملک دی پہلی برسی دے موقعے اُتے پنجاب ہائوس اندر اِکٹھ

Photo Amin Malik

لہور (پریس ریلیز) پچھلے دن پنجابی یونین دے زیر اہتمام پنجاب ہائوس وچ معروف کہانی کار تے پنجابی سیوک امین ملک دی پہلی برسی دے سلسلے وچ اک اکٹھ دا اہتمام کیتا گیا۔ ایس تقریب دی صدارت معروف پنجابی شاعر بابا نجمی نے کیتی۔ تقریب نال خطاب کردے ہوئے چیئر مین پنجابی میڈیا گروپ مدثر اقبال بٹ نے امین ملک مرحوم تے ایہناں دی بیوہ رانی دی پنجابی زبان و ادب لئی خدمات نوں سراہیا۔ مدثر اقبال بٹ نے کہیا کہ امین ملک نے پنجابی کہانی نوں نواں انداز دتا تے ایہناں دی پنجابی ادب لئی خدمات نوں ہمیشہ یاد رکھیا جائے گا۔ ندیم رضا، بلال مدثر بٹ، آصف رضا ، رضوان اصغر بٹ تے اصغر چشتی نے اِکٹھ نال خطاب کردے ہوئے امین ملک دی ادبی خدمات سراہندے ہوئے ایہناں نوں خراج تحسین پیش کیتا۔ بابا نجمی نے صدارتی گل بات وچ پنجاب ہائوس تے پنجابی یونین دی ادب نوازی نوں سراہندے ہوئے کہیا کہ پنجاب ہائوس دی انتظامیہ زندہ تے بچھڑ جان والے ادیباں، دانشوراں نوں یاد کرن دا بوہت وڈا وسیلہ اے۔ اوہناں نے امین ملک دی کہانی تے ڈرامے نوں ادبی میدان وچ اک چنگا تے خوبصورت وادھا قرار دتا اے۔ تقریب دے اہتمام اُتے معزز مہماناں لئی خوبصورت عشایہ دا اہتمام کیتا گیا۔

اپنا تبصرہ گھلو