پنجاب حکومت نوں قبرستاناں وچ مفت تدفین دا حکم
لہور: چیف جسٹس لہور ہائی کورٹ محمد قاسم خان نے پنجاب حکومت نوں قبرستاناں وچ مفت تدفین دا حکم دے دتا۔
چیف جسٹس لہور ہائیکورٹ جسٹس محمد قاسم خان نے اک کیس دی سماعت لئی 8 صفحات اُتے مشتمل تحریری عبوری فیصلہ جاری کیتا اے، چیف جسٹس نے احادیث تے بین الاقوامی قوانین نوں وی فیصلے دا حصہ بنایا اے۔ عدالت نے اپنے فیصلے وچ ایل ڈی اے نوں نجی ہاؤسنگ سوسائٹیز وچ قبرستاناں دی جگہ مختص کرنا لازمی قرار دتا اے۔ ایس دے علاوہ عدالت عالیہ نے آئندہ سماعت تے سب رجسٹرار پراپرٹیز نوں اصلی دستاویزات پیش کرن دا حکم وی دتا اے، کیس دی مزید سماعت 27 جولائی نوں ہوویگی۔
چیف جسٹس لہور ہائی کورٹ نے اپنے فیصلے وچ آکھیا اے کہ شہری ساری زندگی حکومت نوں مختلف اشیاء خریدن تے ٹیکس ادا کردا اے، مرن ویلے وی ایس توں قبر تے دُوجی اشیاء دے نام تے پیسے لئے جاندے نیں، حکومت نوں بحیثیت مسلمان روایات تے اسلامی قوانین دی روشنی وچ قبرستاناں دے حوالے نال اقدامات کرنے چاہیدے نیں، ایہ حکومت دی ذمہ داری اے اوہ متعلقہ شہری دی تدفین دا خرچہ چُکے، انتظامیہ قبرستان تک تدفین لئی مفت ٹرانسپورٹ فراہم کرے، اس دے علاوہ انتظامیہ قبرستاناں دی دیکھ بھال تے درخت لان دے حوالے نال وی اقدامات کرے۔
