بالاں نال زیادتی، بشریٰ انصاری دا دینی مدرسیاں وچ کیمرے لان دا مطالبہ
کراچی: پاکستان شوبز انڈسٹری دی نامور فنکارہ بشریٰ انصاری نے بالاں دے نال ودھدے ہوئے جنسی زیادتی دے واقعات تے آکھیا اے ایہناں واقعات دی روک تھام لئی دینی مدرسیاں تے مولویاں دے کمریاں وچ کیمرے لائے جان۔
اداکارہ بشریٰ انصاری دی اک ویڈیو سوشل میڈیا تے وائرل ہو رہی اے جہدے وچ اوہ مدرسیاں وچ پڑھن والے بالاں دے نال ہون والے جنسی زیادتی دے واقعات تے سکولاں وچ طالب علماں دے نال اساتذہ دے بہیمانہ سلوک تے نہ صرف گل کردی ہوئی نظر آ رہیاں نیں سگوں اوہناں نے ایہناں واقعات دی روک تھام لئی مسئلے دا حل وی پیش کیتا اے۔
بشریٰ انصاری آکھیا دینی مدرسیاں وچ تنہائی دا ماحول زیادہ ہوندا اے، مسیت تے مدرسہ ہون دی وجہ توں تعظیم دی وجہ توں اوتھے شور نہیں ہوندا، زیادہ لوک نہیں ہوندے تے مخصوص ماحول ہوندا اے ایس لئی اوتھے ایہناں لوکاں نوں موقع مل جاندا اے۔ ایس لئی ہر مدرسے تے ہر مولوی دے کمرے وچ کیمرے لان۔
ایہدے علاوہ سکول وچ موجود اساتذہ جہڑے طالب علماں تے تشدد کردے نیں، اوہناں نوں وکھو وکھ طرح توں اذیتاں دیندے نیں اوہناں نوں چپیڑاں نال، لکڑی نال ماردے نیں الٹا ٹنگ دیندے نیں ایہناں سکولاں وچ وی کیمرے لائے جانے چاہیدے نیں تاں جے ایس طرح دے لوکاں تے نظر رکھی جا سکے۔
