پاکستان وچ صرف پی ٹی آئی تے پاک فوج قومی نیں، شیخ رشید

راولپنڈی(پنجابی میڈیا گروپ ) وفاقی وزیر داخلہ شیخ رشید احمد نے مسلم لیگ ن تے پیپلز پارٹی نوں آڑے ہتھاں لیندیاں ہویاں آکھیا اے کہ پاکستان وچ صرف پی ٹی آئی تے پاک فوج قومی نیں،مریم تے بلاول بھٹو زرداری بیہودہ زبان دااستعمال کررہے نیں،ایہناں اپنے لب ولہجے اتے غور کرنا چاہیدا اے۔ بلاول بھٹو زرداری دی سی وی وچ کجھ وی نہیں۔ دنیا دی کوئی سپر پاور سانوں نظر انداز نہیں کرسکدی۔ ساڈے بغیر کسی دی دال نہیں گل سکدی۔ راولپنڈی وچ پریس کانفرنس کردیاں ہویا ںوزیر داخلہ شیخ رشید داآکھنا سی کہ ملک وچ پی ٹی آئی وفاق، پنجاب، خیبر پختونخوا، بلوچستان تے گلگت بلتستان وچ برسراقتدار اے، ہن جلد ای آزاد کشمیر وچ وی تحریک انصاف دی سرکار ہووے گی۔ ملک وچ صرف دو ای چیزاں قومی نیں۔ اک تحریک انصاف جماعت تے دوجی پاک فوج قومی اے۔ ساری اپوزیشن جماعتاں تے قوم فوج دے نال نیں۔ وفاقی وزیر داخلہ نے مزیدآکھیا اے کہ جدوں تیک افغانستان وچ امن نہیں ہووے گا خطے وچ تجارت ممکن نہیں اگر چین ایران وچ 400 ارب ڈالر دی سرمایہ کاری دی گل ہورہی اے،ایہہ ایس ویلے تیک ممکن جدوں تیک افغانستان وچ امن نہ ہووے۔ ایس خطے دی سیاست بدلن جارہی اے۔ افغان جو وی فیصلہ کرن سانوں قبول ہووے گا۔ اوہناں نے مزیدآکھیا اے کہ افغانستان وچ نئے طالبان جنم لے چکے نیں ایہہ او ہ طالبان نہیں جہڑے بندوق دے نال فیصلے کردے سن۔

اپنا تبصرہ گھلو