وفاقی کابینہ دی افواج پاکستان لئی15فیصد خصوصی الائونس دی منظوری

اسلام آباد( پنجابی میڈیا گروپ)وفاقی کابینہ نے افواج پاکستان لئی15فیصد اسپیشل الائونس دی منظوری دے دتی۔وزیراعظم دی زیر صدارت وفاقی کابینہ دا اجلاس ہوئیا جس وچ22نکاتی ایجنڈے اُتے غور کیتا گیا۔جائزہ کمیٹی دی ٹی ایل پی نوں کالعدم قرار دین بارے رپورٹ کابینہ وچ پیش کیتی گئی ۔وفاقی کابینہ نے تحریک لبیک اُتے پابندی برقرار رکھن دا فیصلہ کیا۔اجلاس وچ مسلح افواج دے اہلکاراں لئی خصوصی الائونس2021دی منظوری اُتے وی غور کیتا گیا۔کابینہ نے جائزہ لین توں بعد افواج پاکستان لئی15فیصد اسپیشل الائونس دی منظوری دے دتی۔کابینہ نے پاکستان تحریک انصاف دے رہنما حلیم عادل شیخ دی درخواست اُتے سندھ حکومت ولوں اوہناں اُتے بنائے گئے کیساں دی تحقیقات لئی جے آئی ٹی تشکیل دین دی منظوری وی دتی۔

اپنا تبصرہ گھلو