افغانستان وچ بد امنی دا الزام پاکستان اُتے لانا چنگی گل نہیں : عمران خان

تاشقند(پنجابی میڈیا گروپ)وزیراعظم عمران خان نے آکھیا اے کہ افغانستان وچ بدامنی دے الزامات پاکستان اتے تھوپنا غیر منصفانہ اے، پاکستان نے طالبان نوں مذاکرات دی میز اتے لے آن لئی ہر ممکن کوشش کیتی، الزامات اتے مایوسی ہوئی۔انخلاء توں پہلاں طالبان نوں مذاکرات دی دعوت دینی چاہیدی سی۔ ہن جدوں طالبان نوں افغانستان وچ فتح نظر آرہی اے تے اوہ ساڈی گل کیویں سنن گے۔ مسئلہ کشمیر پاکستان تے بھارت دے وچکار سبھ توں وڈا تے پرانا مسئلہ اے۔ تفصیلات دے مطابق تاشقند وچ میں وسطی تے جنوبی ایشیا رابطہ ممالک دی کانفرنس دے نال خطاب کردیاں ہویاں افغان صدر اشرف غنی نے پاکستان اتے بے بنیاد الزامات لگائے تے وزیراعظم عمران خان نے ایہناں فوری جواب دیندیاں ہویاں آکھیا اے کہ افغان صورتحال دا پاکستان نوں ذمہ دار ٹھہرانا بوہت ناانصافی اے، جدوں پاکستان اتے الزامات لگائے جاندے نیں تے مینوں ایہد ے اتے بوہت مایوسی ہوندی اے۔ وزیراعظم عمران خان نے آکھیا اسیں افغان امن عمل لئی سنجیدہ کوششاں کیتیاں۔ افغانستان وچ بدامنی دے لئی پاکستان اتے الزامات لگانا غیرمنصفانہ اے۔ پچھلے 15 سالاں وچ پاکستان نے70 ہزارافراد د ی قربانی دتی، افغانستان وچ امن سبھ گوانڈی ملکاں دے مفاد وچ اے۔ افغانستان وچ امن خطے وچ امن لئی ضروری اے۔ خدشہ اے افغانستان وچ بدامنی دے نال مہاجرین دی اک نئی لہرآوے گی۔ عمران خان نے مزیدآکھیا اے کہ پاکستان نے طالبان نوں مذاکرات دی میز اتے لے آن لئی ہر ممکن کوشش کیتی۔اوہناں نے مزیدآکھیا اے کہ امریکہ افغانستان و چ فوجی حل دی کوشش کردا رہیا جہڑا ممکن نہیں سی۔ پاکستا ن نے روز اول توں آکھیا افغان مسئلے دا حل عسکری نہیں مذاکرات اے۔ ہن طالبان امریکہ دی گل کیو ں منن گے جدوں افغانستان توں فوجیاں دا انخلاء ہو رہیا اے۔

اپنا تبصرہ گھلو