پنجاب انسٹیٹیوٹ آف لینگویج آرٹ اینڈ کلچر ولوں 14 اگست دی مناسبت نال مصور محمد جاوید دے فن پاریاں دی نمائش

رپورٹ: سید علی قیصر

پنجاب انسٹیٹیوٹ آف لینگویج آرٹ اینڈ کلچر، محکمہ اطلاعات وثقافت پنجاب دے زیر انتظام پنجاب آرٹ گیلری وچ 14 اگست دی مناسبت نال نامور مصور محمد جاوید دے فن پاریاں اُتے مشتمل اک نمائش دا انعقاد کیتا گیا جس دا افتتاح محمد ندیم قریشی پارلیمانی سیکرٹری اطلاعات و ثقافت نے کیتا۔

اوہناں نے کہیا کہ نمائش وچ شامل سارے فن پارے قدیم و جدید دا حسین امتزاج نیں تے ساڈے معاشرے دے سماجی، معاشی، سیاسی تے ثقافتی پہلوئواں دی بھرپور عکاسی کردے نیں۔مصور محمد جاوید نے پارلیمانی سیکرٹری نوں اپنے فن پاریاں اُتے مشتمل کتاب دا تحفہ وی پیش کیتا تے کہیا کہ میرے لئی ایہہ انتہائی خوشی دی گل اے کہ پارلیمانی سیکرٹری فن و ثقافت دے بارے وچ بھرپور واقفیت تے دلچسپی رکھدے نیں۔

ایس موقعے اُتے ڈاکٹر صغرا صدف ڈی جی پلاک نے کہیا کہ اگست ساڈے لئی تجدید عہد دا مہینہ اے ایہہ سانوں ساڈے اسلاف دی قربانیاں دی یاد دلواندا اے تے ساڈے نال تقاضا کردا اے کہ اسیں اپنے وطن عزیز دے نال مخلص رہن تے اپنے فرائض دی ادائیگی وچ پوری جانفشانی تے ایمانداری نال کم کرئیے۔ مزید کہیا کہ پلاک پنجاب آرٹ گیلری سارے آرٹسٹاں دے فن پاریاں دی نمائش لئی بغیر کسے معاوضہ دے فراہم کیتی جاندی اے۔ نمائش وچ دانشوراں، ادیباں تے صحافیاں نے بھرپور شرکت کیتی۔ آخری وچ ملک و قوم دی سلامتی و ترقی لئی دعا کروائی گئی۔

٭٭٭