ایہ ظلم دی حکومت اے جہڑی ہور نہیں چل سکدی: شہبازشریف

لندن: قائد حزب اختلاف شہباز شریف دا کہنا اے ایہ ظلم دی حکومت اے جہڑی ہور نہیں چل سکدی جد کہ نالائق حکومت جاری رہی تے خدانخواستہ پاکستان نوں ناقابل تلافی نقصان ہو جاوے گا۔ صدر (ن) لیگ تے قائد حزب اختکاف شہباز شریف دا کہنا اے مزدور توں روزگار تے پہلاں ای کھوہ لیا اے، ہن اوہدے بالاں دا نوالہ وی کھوہ لیا گیا اے، ایہ ظلم دی حکومت اے جہڑی ہور نہیں چل سکدی، نالائق حکومت جاری رہی تے خدانخواستہ پاکستان نوں ناقابل تلافی نقصان ہو جاوے گا، ہر محب وطن پاکستان نوں پاکستان دی فکر اے، نالائق ٹولے توں جنی جلدی نجات ہووے گی، پاکستان دے قومی، عوامی مفادات لئی چنگا اے۔ شہبازشریف آکھیا عوام دشمن ایجنڈے تے کاربند ٹولے توں ملک و قوم نوں آزادی دوان دی حکمت عملی تے غور کیتا جاوے جد کہ تکبر، ضد تے حماقتاں نے ملک دے ہر شعبہ نوں تباہ کر دتا اے۔ اوہناں آکھیا وفاقی حکومت دی پابندی دے باوجود 25جولائی توں اکتوبر 2019نوں 48ہزار میٹرک ٹن گندم کیویں برآمد کیتی گئی تے اک ارب 83کروڑ روپے کہدی جیب وچ گئے۔