پی ٹی آئی دے 20صوبائی ارکان نے فارورڈ بلاک بنا لیا، سرکار تے دباء ودھان دا فیصلہ

لہور: تحریک انصاف دے کئی ممبران پنجاب اسمبلی نے اپنی ای حکومت تے دباء ودھان دا فیصلہ کردیاں فارورڈ بلاک بنا لیا اے۔

وسیلیاں دے مطابق تحریک انصاف دے وکھو وکھ حلقیاں دے 20ارکان اسمبلی نے ایہ گروپ بنا کے حلف چکیا اے کہ اوہ اک دوجے دے نال رہن گے تے رل کے اپنے مطالبات منوان گے۔

پی ٹی آئی وچ ایہ فارورڈ گروپ جنوبی تے وسطی پنجاب دے 20ارکان نے گروپ بنایا اے۔ اوہناں نے وزیراعلیٰ عثمان بزدار توں اپنے حلقیاں لئی فنڈز تے عوامی منصوبیاں دا مطالبہ وی کر دتا اے۔

رکن پنجاب اسمبلی سردار شہاب دا ایس حوالے نال کہنا سی اسیں تحریک انصاف دے نال آں تے نال رہواں گے تے ایسے پلیٹ فارم توں ای آئندہ الیکشن لڑاں گے۔

سردار شہاب نے تصدیق کیتی کہ حلقیاں دے مسئلیاں دے حل لئی 20ارکان نے گروپ بنایا اے۔ اسیں وزیراعلیٰ پنجاب عثمان بزدار نال ملاقات وچ عوامی مسئلیاں دے حل تے گل کیتی جد کہ ایہ ٹھیک اے کہ اسیں اکٹھے رہن دا حلف وی چکیا اے۔