سرکار تے اپوزیشن وچ چیف الیکشن کمشنر تے 2ارکان دے ناواں تے اتفاق
اسلام آباد: سرکار تے اپوزیشن وچ چیف الیکشن کمشنر تے الیکشن کمیشن دے 2ارکان دے ناواں تے اتفاق ہو گیا۔الیکشن کمیشن ممبران و چیف الیکشن کمشنر دی تقرری لئی سرکار تے اپوزیشن وچکار سپیکر آفس وچ مذاکرات ہوئے۔ اپوزیشن لیڈر نے چیف الیکشن کمشنر لئی 3بندیاں ناصر کھوسہ، اخلاق تارڑ تے عرفان قادر دے ناں پیش کیتے جد کہ سرکار نے جمیل احمد، فضل عباس میکن تے سکندر سلطان راجہ دے ناں پیش کیتے۔
وسیلیاں دے مطابق چیف الیکشن کمشنر تے الیکشن کمیشن ممبران دے ناں فائنل ہو گئے۔ چیف الیکشن کمشنر لئی سرکار دے تجویز کیتے سکندر سلطان راجہ دے ناں تے اتفاق ہو گیا۔ بلوچستان تے سندھ توں کمیشن دے ارکان لئی اپوزیشن دے تجویز کیتے ناں طے ہو گئے نیں۔
ممبر سندھ لئی نثار درانی تے ممبر بلوچستان لئی شاہ محمد جتوئی دے ناں تے اتفاق ہو گیا اے۔ وزیراعظم عمران خان دی حتمی منظوری دے بعد پارلیمانی کمیٹی اج اعلان کرے گی۔
اپوزیشن آکھیا اج ناواں نوں حتمی شکل دتی جاوے تے فیصلے دا اعلان پارلیمانی کمیٹی وچ کیتا جاوے گا۔ اجلاس مگروں میڈیا نال گل کردیاں مشاہد اللہ خان آکھیا چیف الیکشن کمشنر تے دو ممبران دی تقرری دا معاملہ طے نہ ہو سکیا پر اسیں 95فیصد پیشرفت کر لئی، ہن چیف الیکشن کمشنر لئی 6ناں زیر غور نیں، آس اے اج ایہناں وچوں کسے اک ناں تے اتفاق رائے ہو جاوے گا۔
ایس توں پہلاں اپوزیشن لیڈر شہباز شریف نے چیف الیکشن کمشنر دے تقرر لئی وزیراعظم عمران خان نوں خط لکھ کے ناصر کھوسہ، اخلاق تارڑ تے عرفان قادر دے ناں تجویز کر دتے۔ شہباز شریف نے خط وچ آکھیا کہ چیف الیکشن کمشنر دی تقرری لئی جلد اتفاق رائے پیدا کیتا جاوے تاں جے عدالتی فیصلیاں تے عملدرآمد کیتا جا سکے۔واضح رہوے وزیراعظم عمران خان نے وی چیف الیکشن کمشنر لئی 3نویں ناں تجویز کر دتے نیں جہناں وچ جمیل احمد، فضل عباس میکن تے سکندر سلطان راجہ شامل نیں۔
