کراچی خوشحال تےپاکستان خوشحال ،شہباز شریف

کراچی (پنجابی میڈیا گروپ)پاکستان مسلم لیگ (ن) دے صدر تے قائد حزب اختلاف شہبازشریف نے آکھیا اے کہ کراچی دی خوشحالی دے بغیر پاکستان خوشحال نہیں ہووے گا ۔نوازشریف دی قیادت وچ میں اللہ تعالیٰ نے آئندہ چنا وچ موقع ملیا تے کراچی دی قسمت بدل دیاں گے۔ اک جماعت نوں کڈ کے دیگر ساریاں جماعتاں نوں ملا کے کراچی دی حالت سدھارن لئی کم کراںگے۔ ایس جماعت نے تن سال وچ ملک وقوم اتے ظلم ڈھایا،ارباں کھرباں دا سالانہ ٹیکس دین والے شہروچ مسائل دی بھرمار اے۔ لوکائی اک گیلن پانی لئی ترس رہے نیں۔ اک غریب مزدور اک گیلن پانی لوے تے ایہدی دیہاڑی ختم ہوجاوے گی۔ تفصیلات دے مطابق پاکستان مسلم لیگ (ن) دے صدر تے قائد حزب اختلاف شہبازشریف نے این اے 249 کراچی دے عہدیداراں، کارکنان تے عمائدین علاقہ دے نال ملاقات روچ خطاب کردیاں ہویاں کراچی دے مسائل دا ذکر کردیاں ہویاں آبدیدہ ہوگئے۔ تقریر کردیاں ہویاں اپنے جذبات اتے قابو نہ رکھ سکے۔شہبازشریف ہوراں نے آکھیا کہ ایہہ بابائے قوم حضرت قائداعظم دا شہر اے، کمائو شہر دے نال سوتیلی ماں ورغا سلوک ہو رہیا ے۔ اللہ تعالی دے نال دعا اے کہ میرے مرن توں پہلاں کراچی شہر بدل جاوے۔ ایہہ قائد دا شہر اے ،کمائو شہر اے، معاشی مرکز اے۔ سفارتی مرکز وی رہیا اے ۔ ایتھے مہاجر، سندھی، پنجابی، تنولی، بلوچ، بنگالی، بلوچ ، پشتون دیگر اقوام تے علاقیاں دے لوکائی ایتھے رہائش پزیر نیں ،کراچی دی خوشحالی دے بغیر پاکستان خوشحال نہیں ہووے گا ہ

اپنا تبصرہ گھلو