آٹا بحران کیویں تے کیہنے پیدا کیتا، سرکار توں جواب طلب
لہور ہائی کورٹ نے آٹا مہنگا ہون دے خلاف درخواست تے سیکرٹری پنجاب، سیکرٹری فوڈ تے ڈائریکٹر اسٹیٹ بینک نوں طلب کر لیا۔ چیف جسٹس لہور ہائی کورٹ مامون رشید شیخ نے آٹے تے کنک دیاں قیمتاں وچ وادھے دے خلاف درخواست دی سماعت کیتی۔
عدالت نے وفاقی حکومت تے پنجاب حکومت نوں نوٹس جاری کردیاں جواب طلب کر دیاں آکھیا آگاہ کیتا جاوے بحران کیویں پیدا ہویا تے کیہنے پیدا کیتا۔
عدالت نے ایڈیشنل چیف سیکرٹری پنجاب، سیکرٹری فوڈ پنجاب تے ڈائریکٹر اسٹیٹ بینک نوں وی ذاتی حیثیت وچ پیش ہون دا حکم دتا۔ درخواست گزار اظہر صدیق ایڈووکیٹ نے موقف اختیار کیتا حکومت نے چار لکھ میٹرک ٹن کنک ایکسپورٹ کرن دی اجازت دتی، کنک 29روپے فی کلو دے حساب نال برآمد کیتی گئی تے ایہدے تے بھاری ریبیٹ وی دتا گیا۔
