آٹا بحران مگروں مارکیٹ توں دالاں وی غائب

لہور وچ آٹا بحران دے بعد بازار توں دالاں وی غائب ہون لگیاں۔ گراں فروشاں دے خلاف ضلعی انتظامیہ دے چھاپیاں دے نتیجے وچ دکاناں توں دالاں غائب ہون لگی تے 100توں ودھ سٹورز مالکان نے سرکاری ریٹاں تے دالاں فروخت کرنا بند کر دتیاں۔ سپر سٹورز ایسوسی ایشن دا کہنا اے اسیں تھوک تے ڈی سی ریٹ دے فرق نوں ٹھیک کرن دا مطالبہ کیتا سی پر حکومت پنجاب نے دالاں دے ریٹس ودھان دی منظوری اجے تک نہ دتی، مطالبات تسلیم نہ ہون تے دال، سبزی تے پھل دے کاؤنٹر بند کر دتے۔

ڈی سی لہور دانش افضال نے حکم دتا اے سارے اسسٹنٹ کمشنرز دکاناں تے دالاں دی فروخت یقینی بنان، حکومت پنجاب نوں قیمتاں دے حوالے نال سمری گھل دتی اے، پر ایہدے تے اجے تک فیصلہ نہیں ہویا ایس لئی دالاں طے شدہ پرانے ریٹاں تے فروخت ہون گیاں۔

سپر سٹورز ایسوسی ایشن دا کہنا اے تھوک توں مہنگی دال خرید کے ڈی سی ریٹ تے سستی نہیں ویچ سکدے، نقصان توں بچن لئی دالاں رکھنا چھڈ دتیاں، تھوک دا ریٹ ڈی سی ریٹ توں گھٹ ہونا چاہیدا اے، تھوک توں دالاں مہنگی ملدیاں نیں تے 50توں 100روپے تک فی کلو نقصان چکنا پیندا اے، ڈی سی لہور دے نال مذاکرات وچ مسئلے دا حل نہیں نکلیا جہدے تے دالاں ویچنا چھڈ دین۔