سپریم کورٹ ،پنجابی رائج نہ کرن اُتے حکومت نوں نوٹس

جسٹس عمر عطا بندیال نے ریمارکس دتے کہ آ ئین دا آرٹیکل 251قومی دے نال علاقائی زباناں دی وی گل کردا اے،ایہناں بولیاں دے بنا اسیں اپنی پچھان گوا لواں گے
سپریم کورٹ نے پنج دریاواں دی دھرتی دی رہتل دا مقدمہ چُکیا اے،پنجابی دے حقاں نوں ہمیشہ مفاد پرستاں اپنیاں سیاسی مصلحتاں دی نذر کیتا،مدثر اقبال بٹ
جج صاحب دے ریمارکس نھہیرے وچ چانن نیں،امید اے ہن پنجابی نوں رائج وی کیتا جاوے گا:بابا نجمی،پنجابی بولی تے رہتل دا دیوا کدی نہیں بُجھ سکدا:ندیم رضا
سیاسی ایلیٹ پنجابی دی ترقی وچ سب توں وڈی رکاوٹ رہی اے :احمد رضا وٹو،پنجابی آگواں نے سپریم کورٹ دی شنوائی نوں منزل ول سفر دا آغاز آکھ کے ڈھیر سراہیا

اسلام آباد: سپریم کورٹ نے اردو زبان دے حوالے نال توہین عدالت دے کیس دی شنوائی کردیاں پنجابی بولی دے نفاذبارے تریخی ریمارکس دتے نیں۔جسٹس عمر عطا بندیال دی سربراہی وچ سپریم کورٹ دے 3 رکنی بینچ نے اردو نوں سرکاری زبان دےطور اُتے ملک بھر تے پنجابی نوں صوبے وچ رائج نہ کرن اُتےپنجاب حکومتتوں جواب طلب کیتا اے۔قومی زبان بارے اس کیس دی اہمیت اس لئی وی ہے کہ پاکستان مختلف رہتلاں تے تریخی مغالطیاں پاروں فکری مسئلیاں نال دوچار اے۔

ایہناں حالاتاں وچ حکومت ولوں بھاویں اک نصاب دی گل کیتی جارہی اے پر اس دے باوجود زمینی حقیقتاں ایہو دسدیاں نیں کہ اک مخصوص تے با اختیار طبقہ ایہہ ممکن نہیں ہون دیوے گا۔سپریم کورٹ وچ توہین عدالت کیس دی شنوائی دوران جسٹس عمر عطا بندیال نےآکھیا کہ 2015 وچ اردو نوں رائج کرن دا حکم دتا گیا سی پر حکومت اس وچ ناکام رہی ۔آئین دا آرٹیکل 251قومی دے نال علاقائی زباناں دا وی ذکرکردا اے،پنجابی دا نفاذ نہ کرن اُتے اسیں پنجاب حکومت نوں وی نوٹس کر رہے آں ۔ماں بولی تے قومی زبان دے بنا اسیں اپنی پچھان گوا لواں گے ۔اونھاں ایہہ وی آکھیا کہ سانھوں اپنے بزرگاں وانگوں فارسی تے عربی زباناں وی سکھنیاں چاہیدیاں نیں۔سپریم کورٹ دی اس تریخی شنوائی اُتے گل بات کردیاں پنجابی یونین دے پردھان مدثر اقبال بٹ ہوراں دا آکھنا سی کہ سپریم کورٹ نے اج جس مرض دی تشخیص کیتی اے ،ایہو ای سارے مسئلیاں دی جڑ اے۔بدقسمتی نال حکومتاں نے کدی وی دھرتی نال جڑیاں بولیاں لئی سنجیدگی دا مظاہرہ نہیں کیتا تے اپنی رہتل نوں بے گانیاں ثقافتاں دی سولی چڑھاوندیاں کدے شرم نہیں کیتی۔ایسے احساس کمتری نے ساتھوں ساڈے اوہ مان کھوہ لئے جیہڑے ساڈے وڈ وڈیریاں اپنیاں دھوناں لوا کے ساڈے لئی اُچے شملے وانگوں چھڈے سی۔جج صاحب نے اج عام تے مٹی نال جڑے اوس پنجابی دی گل کیتی اے جیہڑا پنے خود غرض سیاستداناں دیاں مکروہ سوچاں تے انگریز نواز پالیسیاں ہتھوں اپنی ہون گواچن دا ماتم کررہیا سی۔جے کر سپریم کورٹ پنجابی نوں نافذ کرن دا تریخی فیصلہ سناوندی اے تے فیر پنجاب دی دھرتی توں ایہہ ڈر وی جاندا رہ سی کہ خورے ساڈے نیانے تے آون والیاں نسلاں پنج دریاواں دی دھرتی نال جڑیاں وی رہن گئیاں یا فیر بیگانیاں رہتلاں دے رنگ وچ رنگ کے اپنا آپ بھل جان گئیاں۔شاعر تے سماج سیوک بابا نجمی نے وی ایہناں ریمارکس نوں نھیرے چے چانن گردان دیاں آکھیا کہ سانھوں امید اے کہ آون والے دناں وچ پنجابی وی انج ای ترقی کرے گی جیویں سندھی تے پشتو سنے دوجیاں علاقائی زباناں کر رہیاں نیں۔اسیں پنج دریاواں دی دھرتی دے واسی جج صاحب نو ں سلام پیش کردے ہاں جنھاں اس مٹی دے مڈھلے حقاں دی گل کیتی جیہڑے طاقتور طبقے نے نپے ہوئے سن۔پنجابی میڈیا گروپ دے صدر ندیم رضا نے آکھیا کہ ہُن پنجابی دے حق دی گل اوس فورم اُتے ہورہئی اےجتھوں انصاف دی امید کیتی جاسکدی اے،نہیں تے ہمیشہ ساڈی ماں بولی دا قتل کرن لئی سازشاں ای کیتیاں گئیاں نیں۔اونھاں آکھیا کہ پنجاب دی بولی دی سب توں وڈی بدنصیبی اوہ سیاستدان نیں جنھاں اس دھرتی توں ووٹ تے لئے پر ایہدے سماجی تے ثقافتی حقاں لئی کدی آواز نہیں چُکی۔اج وی پنجاب نوں ونڈن دی گل تے ہُندی اے پر ایہنوں سنوارن یا ایہدے مسئلے حل کرن دی گل کوئی نہیں کردا۔پنجابی پرچار دے آگو احمد رضا وٹو دا کہنا سی کہ اسیں ہمیشہ پنجابی نوں رائج کرن لئی آواز چکی اے ۔اسیں ہر فورم اُتے لڑے وی آں پر بدقسمتی نال سانھوں اپنی ہی سیاسی ایلیٹ دی مخالفت دا سامنا کرنا پیا اے۔اج سپریم کورٹ ولوں ٹھنڈی ہوا دا بُلا آیا اے جنھیں ساڈے سینے ٹھار دتے نیں،اسیں امید کردے ہاں کہ ایہہ کیس پنجاب دے حقاں دی نویں تریخ لکھے گا۔

اپنا تبصرہ گھلو