عالمی طاقت طالباناں دے اثاثے بحال کرے،شاہ محمود قریشی

نیویارک(پنجابی میڈیا گروپ) وزیر خارجہ شاہ محمود قریشی نے آکھیا اے کہ عالمی طاقتاں طالبان دے منجمد کیتے گئے ارباں ڈالر دے اثاثے بحال کرن۔بھارت نے وزیر اعظم عمران خان دی امن دی پیشکش نوں نہ صرف رد کیتا بلکہ 5 اگست2019 نوں مقبوضہ کشمیر وچ یکطرفہ اقدامات کیتے جہدے نال خطہ عدم استحکام دا شکار ہویا ۔ ایہناں خیالات دا اظہار اوہناں نے پاکستان ہاؤس نیویارک وچ بین الاقوامی نشریاتی اداریاں دے نال منسلک پترکاراں دے نال گل بات کردیاں ہویاں کیتا۔ وزیرخارجہ نے اہم علاقائی امور اتے پاکستا ن دے نکتہ نظر دی وضاحت دے علاوہ افغانستان دی صورتحال اتے وچار کیتا تے پترکاراں دے سوالاں دے جوابات وی دتے۔ شاہ محمود قریشی نے آکھیا کہ افغان شہریاں نے پچھلے چاردہائیاں وچ جنگ وجدل دا ساہمنا کیتا اے۔ہن افغانستان وچ قیام امن دی امید پیدا ہوئی اے۔عالمی طاقتاں طالبان دے منجمد کیتے گئے اثاثے بحال کرن،وزیرخارجہ شاہ محمود قریشی نے مزیدآکھیا اے کہ عالمی برادری نوں ایس نازک موڑ اتے افغاناں نوں تنہا نہیں چھڈنا چاہیدا اے۔ پرامن افغانستان پور ے خطے دے مفاد وچ ہووے گا۔ ساڈی معیشت مزید مہاجرین دا بوجھ چکن دی متحمل نہیں ہو سکدی۔ اگر افغانستان وچ صورتحال کشیدہ ہوندی اے تے پاکستان سبھ توں زیادہ متاثر ہوووے گا۔پاک بھارت تعلقات دے حوالے توں وزیر خارجہ نے آکھیا کہ پاکستان خطے وچ امن کاوشاں وچ شراکت داری دا خواہاں اے،وزیر اعظم عمران خان نے منصب سنبھالن دے بعد بھارت نوں دعوت دتی کہ اگر اوہ اک قدم امن ول ودھدن گے تے اسیں دو ودھاواں گے ۔پر بھارت نے ایس پیشکش نوں قبول کرن دی بجائے مقبوضہ جموں و کشمیر وچ 5 اگست 2019 دے یک طرفہ تے غیر آئینی اقدامات کیتے جس نے صورتحال نوں مزید پیچیدہ کر دتا۔

اپنا تبصرہ گھلو