نیشنل کرائم ایجنسی دے فیصلے اُتے حکومت پریشان اے: شہباز شریف
لہور(پنجابی میڈیا گروپ)اپوزیشن لیڈر قومی اسمبلی شہباز شریف نے آکھیا اے کہ نیشنل کرائم ایجنسی دے فیصلے اتے حکومتی صفاں وچ کہرام اے ۔سوا تن سال وچ طوفان بدتمیزی مچیا رہیا، ارباں دے الزامات لگے، نیب، ایف آئی اے نوں اک دھیلے دی کرپشن دا کوئی ثبوت نہیں ملیا۔ہن حقائق پوری قوم دے ساہمنے آچکے نیں۔ پاکستان مسلم لیگ نون دے صدر شہباز شریف نے نیوز کانفرنس کردیاں ہویاں آکھیا اے کہ حکومتی صفاں وچ اک کہرام مچیا ہویا اے۔ میرے اتے لگائے گئے کہڑے ثابت ہوئے؟وزراء دن رات ٹی وی اتے بے بنیاد الزامات لگاندے رہے۔ ڈیلی میل وچ میرے خلاف اسٹوری چھپوائی گئی۔ مینوں تے پارٹی ارکان نوں جیل بھجوایا گیا ‘کیہ نکلیا؟سبھ نے صرف جھوٹھ ای بولیا۔پچھلے وزیراعلیٰ پنجاب تے لیگی رہنما نے مزیدآکھیا کہ ڈیلی میل اسٹوری وچ رتی بھر سچائی ہوندی تے میرے کولوں رقم نکلوا لیندے۔ این سی اے نے آکھیا اسیں چھان بین ختم کردتیاں۔ عدالت نے ٹھپہ لگا دتا۔ عمران نیازی تے ایہناں دے چیلاں دا جھوٹھ بے نقاب ہویا۔ ایہناں نوں مینوں بدنام کرن وچ کوئی کسر نہیں چھڈی۔قدرت دا نظام اے ویلا ثابت کرے گا کہڑا صادق تے امین اے۔





















