افغانستان:شرپسند عناصر توں باخبر رہنا پئے گا،شاہ محمود قریشی

اسلام آباد(پنجابی میڈیا گروپ) وزیرخارجہ شاہ محمود قریشی داآکھنا اے کہ افغانستان دے حوالے دے نال شرپسنداں دی موجودگی تے عزائم توں باخبر رہنا ہووے گا،دفترخارجہ دے ولوں جاری بیان وچ دسیا گیا اے کہ پاکستان تے ڈنمارک دے وچکار وفود دی سطح اتًے مذاکرات دا انعقاد کیتا گیا۔ ایس حوالے دے نال ڈینش وزیرخارجہ یپے کوفو اپنے وفد دے ہمراہ وزارت خارجہ آپڑے، جد کہ پاکستانی وفد دی قیادت وزیر خارجہ مخدوم شاہ محمود قریشی نے کیتی، مذاکرات وچ دو طرفہ تعلقات، افغانستان دی بدلدی صورتحال سنے باہمی دلچسپی دے امور اتے وچار کیتا گیا۔ وزیرخارجہ شاہ محمود قریشی داآکھنا سی کہ پاکستان ڈنمارک دے نال دو طرفہ تعلقات نوں خصوصی اہمیت دیندا اے ، جی ایس پی پلس اسٹیس دے حوالے دے نال اسیں پاکستان دی معاونت اتے اسیں ڈنمارک دے شکر گزار نیں،شاہ محمود قریشی داآکھنا سی کہ اسیں اک ہزار توں زائد ڈینش شہریاں نوں کابل توں محفوظ انخلاء وچ معاونت فراہم کیتی۔ افغانستان وچ حالیہ تبدیلی دے دوران خون خرابے تے خانہ جنگی دانہ ہونا مثبت پہلو نیں۔ شاہ محمود قریشی نے مزیدآکھیا اے کہ سانوں افغانستان دے حوالے دے نال شرپسنداں دی موجودگی تے عزائم توں باخبر رہنا ہووے گا،لوڑ ایس امر دی اے کہ افغانستان وچ جنم لیندے انسانی ومعاشی بحران توں نمٹن لئی عالمی برادری افغاناں دی معاونت لئی ٹھوس اقدامات چکے۔

اپنا تبصرہ گھلو