وزیراعظم نال وزیراعلیٰ سندھ دی ملاقات، آئی جی دی تبدیلی تے اتفاق
اسلام آباد/کراچی: وزیراعظم عمران خان تے وزیراعلیٰ سندھ مراد علی شاہ وچکار ملاقات وچ آئی جی پلس دی تبدیلی تے اتفاق کر لیا گیا اے۔ وزیراعظم عمران خان اک روزہ دورے تے کراچی آئے نیں جتھے اوہ کئی اہم تقاریب وچ رلت دے علاوہ دوجے معاملیاں تے وی مشاورت کرن گے۔ گورنر ہاؤس کراچی وچ وزیراعظم عمران خان نال وزیراعلیٰ سندھ مراد علی شاہ نے ملاقات کیتی، ایس موقع تے گورنر سندھ عمران اسماعیل وی موجود سن۔ وزیراعلیٰ نے صوبے وچ امن و امان دی صورتحال تے تفصیلی گل کیتی تے آئی جی کلیم امام بارے سندھ کابینہ دے فیصلیاں تے تحفظات توں وی وزیراعظم نوں آگاہ کیتا، گورنر عمران اسماعیل نے وی آئی جی سندھ نوں تبدیل کرن دے مطالبے دی حمایت کیتی۔ ملاقات وچ وزیراعظم نے سندھ وچ آئی جی پلس تبدیل کرن تے اتفاق کیتا تے فیصلہ کیتا گیا آئی جی سندھ لئی زیر غور افسراں وچ کسے اک نوں تعینات کر دتا جاوے گا۔وزیراعظم گورنر ہاؤس وچ پیر پگارا نال ملاقات کرن گے جد کہ اوہناں دی متحدہ قومی موومنٹ دی قیادت نال ملاقات طے نہیں، ایہدی تصدیق ایم کیو ایم ولوں وی کر دتی گئی اے۔ ایم کیو ایم ذرائع دا کہنا اے ایم کیو ایم دی خواہش اے وزیراعظم بہادر آباد آن تے ایم کیو ایم قیادت نے اسلام آباد وچ ہون والی ملاقات وچ وی ایس خواہش دا اظہار کیتا سی۔ ایم کیو ایم پاکستان دے معاملات وزیراعظم دی کمیٹی ویکھ رہی اے۔ جلد ای معاملات طے ہون دے بعد ایم کیو ایم دے کنوینر خالد مقبول صدیقی اسلام آباد وچ ای وزیراعظم نال ملاقات کرن گے۔
