اسلام آباد ہائیکورٹ، احسن اقبال دے بھرا مصطفی کمال دی عبوری ضمانت منظور

راولپنڈی: اسلام آباد میٹرو دی تزئین و آرائش بارے کرپشن کیس وچ احسن اقبال دے بھرا مصطفی کمال دی عبوری ضمانت منظور، اسلام آباد ہائی کورٹ نے نیب نوں احکامات جاری کردیاں ہوئیاں ملزم 10فروری تک گرفتار نہ کرن دی ہدایت کیتی اے۔

اسلام آباد میٹرو منصوبے دی تزئین و آرائش وچ کرپشن کیس دی سماعت اسلام آباد ہائی کورٹ دے چیف جسٹس اطہر من اللہ دی سربراہی وچ دو رکنی بنچ نے کیتی، عدالت دے ساہمنے ملزم مصطفی کمال دی عبوری ضمانت دی عرضی پیش کیتی گئی جہنوں منظور کر لیا گیا۔ عدالت عالیہ نے مصطفی کمال دی گرفتاری توں نیب نوں 10فروری تک روک دتا۔ ملزم نوں 5لکھ دے مچلکے جمع کروان دا حکم دتا گیا اے جد کہ نیب نوں نوٹس جاری کردیاں 10فروری نوں جواب وی طلب کر لیا۔ واضح رہوے مصطفی کمال، ن لیگی رہنما احسن اقبال دے بھرا نیں۔