ساڈی سبھ توں وڈی جنگ قنون دی بالادستی نوں قائم کرنا اے،عمران خان
اسلام آباد(پنجابی میڈیا گروپ) وزیراعظم عمران خان نے آکھیا اے کہ ساڈی سبھ توں وڈی جنگ قانون دی بالادستی نوں قائم کرنا اے۔ ریاست مدینہ و چ جہڑا جرنیل چنگی کارکردگی وکھاندا اوہ اتے آئوندا سی۔ میں آخری ساہ تیک ملک وچ انصاف تے قانون دی بالادستی دی جنگ لڑدا رواں گا۔ جدوں تیک ایہ جنگ نہیں جتاں گے ملک وچ نہ صحیح جمہوریت آوے گی تے نہ خوشحالی۔اسلام آباد وچ قومی رحمت للعالمین کانفرنس دے نال خطاب کردیاں ہویاں وزیراعظم عمران خان نے آکھیا اے کہ پاناما کیس وچ کیہ دساں کس طرحاں دے جھوٹھ بولے گئے ۔ ایہہ کیس برطانوی عدالت وچ ہوندا تے ایہناںنوں ایسی ویلے جیل وچ پا دتا جاندا۔مغرب تے پاکستان دے عدالتی نظام وچ زمین آسمان دا فرق اے۔وزیراعظم عمران خان ہوراں نے آکھیا کہ جدوں تیک قانون آزادنہیں ہووے گاملک اوتے نہیں جا سکدا، برطانوی جمہوریت وچ ووٹ بکنے دا تصور وی نہیں کیتا جاسکدا۔ ایتھے سبھ نوں پتہ اے کہ سینیٹ چنا وچ پیسہ چلدا اے۔ برطانیہ وچ چھانگا مانگا ورغی یا مری وچ بند کرکے ووٹ لین دی سیاست نہیں ہوندی۔ عمران خان نے مزیدآکھیا کہ ریاست مدینہ وچ انصاف تے میرٹ دی حکمرانی سی، جہڑا جرنیل وی چنگی کارکردگی وکھاندا سی اوہ اتے آجاندا سی۔ وڈا عہدہ ملنا کسی دا پیدائشی حق نہیں۔ حضرت بلال جہڑے پہلے غلام سن جہڑے وزیر خزانہ بن گئے سن، جہدے وچ وی صلاحیت ہوندی اوہ ترقی کردا سی۔





















