کالعدم تنظیم نال مذاکرات کامیاب، مقدمے واپس لے لواں گے: شیخ رشید

اسلام آباد(پنجابی میڈیا گروپ)وفاقی وزیرداخلہ شیخ رشید نے آکھیا اے کہ کالعدم جماعت دے نال آٹھ گھنٹے تیک طویل مذاکرات ہوئے جہڑے کامیاب ہوگئے نیں۔ منگل بدھ تیک کالعدم جماعت دے خلاف کیسزواپس لے لواں گے۔ وزیر داخلہ شیخ رشید داآکھنا سی کہ سرکار تے کالعدم تنظیم دے وچکار مذاکرات دی کامیابی دے بعد گرفتار افراد نوں رہا کر دتا جاوے گا، شیڈول فورتھ اتے وی نظرثانی ہووے گی، فرانسیسی سفیر دا معاملہ پارلیمنٹ وچ لے کے جاواں گے۔ انتظامیہ نوں جی ٹی روڈ توں کنٹینر ہٹان دی ہدایت کردتی اے۔ طے پایا اے کہ منگل دی شام تیک ایہہ لوکائی مریدکے وچ رہین گے۔ایدھر کالعدم جماعت دے ممکنہ احتجاج دے باعث جڑواں شہراں دا زمینی رابطہ منقطع ہون دے نال شہریاں نوں مشکلاں دا سامنا اے۔ مری روڈ ، میرٹھ، چوک، راول روڈ ،چاندنی چوک سنے اہم شاہراہاں نوں کنٹینر لگا کے بند کر دتا گیا اے۔واضح روے کہ وزیراعظم عمران خان نے سعودی عرب روانگی توں پہلاں وزیرداخلہ شیخ رشید، وفاقی وزیر مذہبی امور نورالحق قادری تے صوبائی وزیرقانون راجا بشارت اتے مشتمل حکومتی ٹیم نوں کالعدم تنظیم دی قیادت دے نال مذاکرات کرکے معاملات نوں حل کرن دی ہدایت جاری کیتی سی۔

اپنا تبصرہ گھلو