چین دا اوکھے ویلے ساتھ دینا چاہیدا اے، پاکستانی ماہرین معاونت کرن: چیئرمین سینیٹ
اسلام آباد: چیئرمین سینیٹ صادق سنجرانی آکھیا اے چین پاکستان دا سدا بہار دوست، اوکھے ویلے وچ کم آیا۔ کرونا وائرس دی شکل وچ ہن چین تے مشکل ویلا آیا اے تے سانوں ساتھ دینا چاہیدا اے۔
لوڑ پوے تے ساڈے ماہرین چین دی معاونت کرن۔ سینیٹ اجلاس دے دوران پیپلزپارٹی دی رہنما شیری رحمان آکھیا کرونا وائرس انسانیت لئی چیلنج اے، چین وائرس نال نبڑن لئی فوری اقدامات کیتے، پاکستان نوں چین دی حمایت کرنی چاہیدا اے، پاکستان بیماری دی تشخیص لئی کرونا کٹس فوری منگوائے۔
پی پی رہنما نے ہور آکھیا اپنے ملک دے شہریاں دی حفاظت پہلی ذمہ داری ہوندی اے، چین وچ پاکستانی سفارتخانے دی ہیلپ لائن کم نہیں کر رہی، ملکی ایئر پورٹاں تے سکریننگ دے حوالے نال نظام کم نہیں کر رہیا۔ دوجے ممالک چین توں اپنے شہری کڈھ رہے نیں۔ سینیٹر محدن عزیز دا اپنے خطاب وچ کہنا سی پاکستانی طلباء نوں بے یارومددگار چین وچ نہ چھڈیا جاوے، اوہناں نوں کورنٹائن، آئی سولیشن وارڈ وچ رکھیا جاوے جہڑے طلباء ٹھیک نیں اوہناں نوں حکومت ملک وچ داخل ہون دی اجازت دیوے۔
خاتون سینیٹر سیمی ایزدی آکھیا حکومت دا اقدام سخت لگ رہیا ہووے گا، چین ایس بیماری دا علاج کڈھ لوے گا ایسے لئی پاکستانی طلباء نوں اوتھے روکیا گیا اے۔ طلباء دا چین وچ بہتر علاج ہووے گا، اسیں ایس بیماری دا علان نہیں کر سکدے۔
