نیب ترامیم تے پیپلزپارٹی تے مسلم لیگ (ن) اختلافات دا شکار

اسلام آباد: نیب ترامیم تے پیپلزپارٹی تے ن لیگ تقسیم دا شکار ہو گئیاں تے دوواں جماعتاں نے وکھرا وکھرا مسودہ حکومت دے حوالے کر دتا اے۔

نیب ترامیم تے پیپلزپارٹی تے مسلم لیگ (ن) نے مشترکہ مسودہ دین تے اتفاق کیتا سی پر ذرائع دا کہنا اے پیپلزپارٹی تے مسلم لیگ (ن) نے نیب ترامیم تے ہن اپنا اپنا مسودہ حکومت دے حوالے کر دتا اے، پیپلزپارٹی نوں مسلم لیگ (ن) دی تجویز کیتی گئی نیب ترامیم پسند نہیں آئیاں۔

وسیلیاں دے مطابق پیپلزپارٹی دا کہنا اے حکومت ساڈے نال فاروق ایچ نائیک دے سینیٹ کمیٹی توں منظور شدہ مسودہ تے گل کرے، سرکار اپوزیشن دی تجویز کیتی گئی نیب ترامیم دا پیر نوں جائزہ لے کے منگل نوں جواب دیوے گی جد کہ نیب ترامیم تے حکومت تے اپوزیشن دی منگل نوں پارلیمنٹ ہاؤس وچ میٹنگ ہووے گی۔

مجوزہ ترمیم وچ آکھیا گیا اے 50کروڑ روپے یاں ایہدے توں گھٹ بدعنوانی دا مقدمہ نیب دے دائرہ اختیار توں کڈھ دتا گیا اے، پنج سو ملین توں گھٹ دا مقدمہ اینٹی کرپشن نوں ویکھنا چاہیدا اے تے نیب عدالت دے کول ضمانت دا اختیار ہونا چاہیدا اے۔

مجوزہ ترمیم وچ آکھیا گیا اے الزام لگن تے کسے نوں گرفتار نہیں کیتا جا سکے گا جد کہ غلط الزام لان یاں غلط تفتیش کرن والا نیب افسر جوابدہ ہووے گا۔