کشمیر تے سمجھوتے یاں سودے بازی دا سوال ای پیدا نہیں ہوندا: وزیر خارجہ

اسلام آباد: وزیر خارجہ شاہ محمود قریشی دا کہنا اے پاکستان وچ کوئی وی حکومت کشمیر تے کدی سودے بازی نہیں کر سکدی۔

پارلیمانی کشمیر کمیٹی دے اجلاس وچ اظہار خیال کردیاں وزیر خارجہ شاہ محمود قریشی دا کہنا سی ایہ پیغام سرحد دے دوواں پاسیوں واضح اے کہ پاکستان وچ کوئی وی حکومت کشمیر تے کدی سودے بازی نہیں کر سکدی، کشمیر تے ڈیل دا سوال ای پیدا نہیں ہوندا، کشمیر تے پاکستان دی اک واضح پالیسی موجود اے تے ایس معاملے تے پاکستان دی ساری سیاسی جماعتاں تے قوتاں اک زبان نیں تے ایس مسئلہ تے مکمل اتفاق رائے موجود اے۔

وزیر خارجہ دا کہنا سی بھارت دے اگست 2019دے اقدامات نال مقبوضہ کشمیر وچ معیشت نوں شدید نقصان اپڑیا، پڑھے لکھے تے برسر روزگار کشمیری نوجواناں دا مستقبل تباہ کیتا جا رہیا اے، کشمیری نوجوان نسل لئی مودی دا کشمیر پلان ناقابل قبول اے، مودی دی انتہا پسند پالیسیاں دی وجہ توں لائن آف کنٹرول دے دوواں پاسیوں کشمیری عوام اک زبان ہو چکے نیں، کشمیر تے مودی دی ہٹ دھرمی نوں کشمیریاں نے رد کر دتا اے۔