وزیراعظم عمران خان نے احساس کفالت پروگرام دا افتتاح کر دتا

اسلام آباد: وزیراعظم عمران خان نے احساس کفالت پروگرام دا افتتاح کر دتا۔ احساس کفالت پروگرام دی افتتاحی تقریب نال خطاب کردیاں وزیراعظم عمران خان دا کہنا سی ہیٹھلے طبقے نوں اُتے کرن والا ملک ای اگے ودھدا اے، دنیا وچ تیزی نال ترقی کرن والی قوم چین دی اے جتھے 30ورھیاں وچ 70کروڑ عوام نوں غربت توں کڈھیا گیا نکے طبقے نوں ودھایا گیا تے اج چین ملک دے بہترین معیشت والا ملک اے۔

وزیراعظم عمران خان دا کہنا سی بے نظیر انکم سپورٹ پروگرام دا پیسہ چوری ہو رہیا سی جہدے نال مستحق عوام اپنے حق توں محروم رہے، ساڈی سرکار د ی سب توں وڈی کامیابی ایہ اے کہ اسیں 70لکھ مستحق بندیاں نوں ہیلتھ کارڈ ونڈے، احساس کفالت پروگرام دا شدت نال انتظار سی جہدے لئی پہلی واری 200ارب روپے رکھے نیں۔

وزیراعظم آکھیا دنیا وچ امیر ترین لوک پاکستان نیں پر پاکستان آپ پچھے رہ گیا، اسیں نکے طبقے نوں ملکی ترقی دی دوڑ وچ شامل کرنا اے، اگلے دو ہفتے وچ احساس دا اگلا پروگرام آوے گا جہدے وچ غریب لوکاں نوں گاواں تے بھینساں دیواں گے، غریب گھرانے دے بالاں نوں سکالر شپ دیواں گے، جد کہ اوہ نوجوان جہڑے کاروباری اعتبار نال نویں تے بہترین آئیڈیاز لے کے آن گے اوہناں نوں قرض دتا جاوے گا۔