فضائی آپریشن بحال: چین توں 40طلبا سنے 183پاکستانی وطن واپس اپڑ گئے
اسلام آباد: چین تے پاکستان وچکار فضائی آپریشن بحال کر دتا گیا، چین توں 3 پروازاں دے راہیں 40طلباء سنے 183مسافر اسلام آباد اپڑ گئے جہدے وچ 172پاکستانی تے 11چینی باشندے شامل سن۔ ایئر پورٹ حکام دے مطابق سول ایوی ایشن اتھارٹی نے کرونا وائرس دی وجہ توں 29جنوری نوں چین تے پاکستان دے وچکار فضائی آپریشن معطل کیتا سی جہڑا ہن بحال کر دتا گیا اے۔
ارمچی توں پہلی براہ راست پرواز 61پاکستانیاں نوں لے کے اسلام آباد انٹرنیشنل ایئر پورٹ اپڑی جہدے وچ 11چینی تے 50پاکستانی مسافر سوار سن۔ دوجی غیر ملکی ایئر لائن دی پرواز کیو آر 632توں 40طلبا براستہ دوحہ اسلام آباد اپڑے۔
ایئر پورٹ تے وزارت صحت نے چین توں آن والیاں لئی خصوصی ڈیسک بنائے جتھے اوہناں دا میڈیکل چیک اپ تے سکریننگ کیتی گئی، میڈیکل چیک اپ دے بعد سارے طلبا نوں گھر جان دی اجازت دے دتی گئی، کسے وچ کرونا وائرس نہیں ملیا۔ تیجی پرواز سی زیڈ5241ارمچی توں براہ راست 82مسافراں نوں لے کے اسلام آباد اپڑی۔
