اثاثہ جات کیس: رانا ثنا نے نیب لہور وچ پیش ہون توں معذرت کر لئی

لہور: آمدن توں ودھ اثاثہ جات کیس وچ رانا ثنا نے قومی اسمبلی سیشن دی وجہ توں نیب وچ پیش ہون توں معذرت کر لئی۔ سابق صوبائی وزیر قنون نوں 17فروری دے بعد دوبارہ طلب کرن دا امکان اے۔ رانا ثنا دے وکیل نیب دی تحقیقاتی ٹیم دے ساہمنے پیش ہوئے۔

وکیل محسن رضا دا کہنا سی نیب لہور وچ پیش ہو کے رانا ثنا دا بیان جمع کروا دتا اے، رانا ثنا قومی اسمبلی دے اجلاس وچ مصروف نیں۔

انوسٹی گیشن ٹیم نے اجلاس دے بعد پیش ہون دا آکھیا اے۔ نیب نے رانا ثنا نوں اوہناں دی فیصل آباد وچ جائیداد، فارم ہاؤسز تے پنجاب بینک وچ شیئرز دی تفسیلات وی فراہم کرن دا حکم دتا سی جد کہ اوہناں دے اہل خانہ دے ناں جہڑی پراپرٹی اے اوہدی تفصیلات وی نال لیان دا آکھیا گیا اے۔