نااہلی درخواست، فیصل واوڈا دی حتمی فیصلے تک رکنیت معطل کرن دی استدعا رد
اسلام آباد: الیکشن کمیشن نے فیصل واوڈا دی نااہلی لئی عرضی تے حتمی فیصلے تک وفاقی وزیر دی رکنیت معطل کرن دی استدعا رد کر دتی۔
چیف الیکشن کمشنر جلال سکندر سلطان دی سربراہی وچ پنج رکنی کمیشن نے فیصل واوڈا دے خلاف درخواستاں دی سماعت کیتی۔ درخواست گزار ولوں فیصل واوڈا دے امریکی تے پاکستانی پاسپورٹاں دی نقلاں تے امریکی قونصلیٹ سرٹیفکیٹ دی نقل پیش کیتی گئی۔
چیف الیکشن کمشنر آکھیا کیہ تسیں نقلاں تے اخباری تراشیاں تے انحصار کرو گے یاں تصدیق شدہ نقل وی فراہم کرو گے، درخواست گزار آکھیا اگلی سماعت تے تصدیق شدہ نقلاں فراہم کر دیواں گے۔
درخواست گزار دے وکیل نے فیصلہ آن تک فیصل واوڈا دی رکنیت معطلی دی استدعا کیتی جہدے تے ممبر الیکشن کمیشن الطاف ابراہیم قریشی آکھیا اجہی پہلاںکوئی مثال موجود نہیں، فیصل واوڈا نوں وی سنیا جاوے گا۔
ممبر ارشاد قیصر دا کہنا سی کاغذات نامزدگی وچ غلط بیانی کرن تے آرٹیکل 62دا اطلاق ہوندا اے، ویکھنا ہووے گا امریکی شہریت چھڈی کدوں گئی؟ الیکشن کمیشن نے فیصل واوڈا نوں نوٹس جاری کردیاں سماعت 27فروری تک ملتوی کر دتی۔
