چیف جسٹس پاکستان دے دو عہدیاں دے خلاف دائر عرضی خارج

اسلام آباد: سپریم کورٹ نے چیف جسٹس پاکستان دے دو عہدیداں دے خلاف دائر عرضی خارج کر دتی۔ سپری مکورٹ نے قرار دتا چیف جسٹس دی جوڈیشل پالیسی ساز کمیٹی دی سربراہی آئین دے خلاف نہیں، جوڈیشل پالیسی ساز کمیٹی آرڈیننس عدلیہ نوں ہور طاقتور بناندا اے، چیف جسٹس نوں بطور چیئرمین جوڈیشل پالیسی ساز کمیٹی کوئی مراعات وی نہیں ملدیاں۔ درخواست گزار ریاض راہی نے اعتراض کیتا کہ پالیسی بنانا عدلیہ دا نہیں ایگزیکٹو دا اختیار اے۔

جسٹس اعجاز الاحسن آکھیا پالیسی ساز کمیٹی وچ اعلیٰ عدلیہ دے ججز شامل ہوندے نیں، جوڈیشل پالیسی ساز کمیٹی عدلیہ دی کارکردگی دا جائزہ لے کے فیصلے کردی اے، عدلیہ دی کارکردگی دے حوالے نال فیصلہ ایگزیکٹو کیویں کر سکدا اے؟ریاض حنیف راہی آکھیا پرویز مشرف دے دو عہدے وی تے عدالت کالعدم قرار دے چکی۔ ریاض راہی نے کیس کسے ہور بنچ وچ منتقل کرن دی استدعا کردیاں آکھیا سابق چیف جسٹس 2018وچ حکم دے چکے کہ مقدمہ کسے ہور عدالت وچ لایا جاوے۔

جسٹس اعجاز الاحسن آکھیا سابق چیف جسٹس نے آپ مقدمہ سنن توں معذرت کیتی سی۔ چیف جسٹس گلزار احمد آکھیا سابق چیف جسٹس دے موقف نال متفق ہونا لازمی نہیں۔ سپریم کورٹ نے کیس کسے ہور بنچ وچ منتقل کرن دی استدعا وی رد کر دتی۔