قومی اسمبلی: کشمیریا ں نال اظہار یکجہتی دی قرارداد متفقہ طور تے منظور

اسلام آباد: قومی اسمبلی وچ کشمیریاں نال اظہار یکجہتی لئی قرارداد متفقہ طور تے منظور کر لئی گئی۔ چیئرمین کشمیر کمیٹی سید فخر امام نے کشمیریاں نال اظہار یکجہتی لئی قرارداد ایوان وچ پیش کیتی جہدے متن وچ آکھیا گیا اے ایہ تریخی قرارداد اے تے پنج فروری کشمیریاں نال اظہار یکجہتی دا دیہاڑ اے، مقبوضہ کشمیر وچ انسانی حقوق دی بدترین خلاف ورزیاں جاری نیں، سویلین آبادی تے بھارت دی اشتعال انگیز کاروائیاں جاری نیں، بھارت وچ نسلی پیمانے تے استحصال جاری اے۔

قرارداد وچ آکھیا گیا اے کشمیر عوام 7دہائیاں توں بھارتی تسلط وچ محصور نیں تے حق خود ارادیت لئی 7دہائیاں توں جدوجہد کر رہے نیں، عورتاں تے بالاں سنے کشمیری قربانیاں دے رہے نیں۔

قرارداد وچ ہور آکھیا گیا اے کشمیر عالمی تنازع تے اقوام متحدہ دے ایجنڈے تے 1948توں حل طلب معاملہ اے، اقوام متحدہ نے حالیہ دناں وچ دو واری کشمیری دا متنازعہ معاملہ تسلیم کیتا ایس لئی کشمیریاں نوں یو این قرارداداں دے مطابق حق خود ارادیت دتا جاوے۔قرارداد وچ آکھیا گیا اے بھارت دی 9لکھ فوج نے دنیا دا سب توں وڈا جیل خانہ بنا دتا اے، 13ہزار نوجواناں نوں نومعلوم مقامات تے قید رکھیا ہویا اے، پیلٹ گنز دا استعمال ہزاراں کشمیریاں نوں زخمی کیتا گیا۔

قرارداد وچ کشمیریاں دی اخلاقی، سیاسی تے سفارتی حمایت جاری رکھن دے عزم دا وی اعادہ کیتا گیا اے۔