کشمیر تے وزارت خارجہ سنے اداریاں نے وزیراعظم دا پورا ساتھ نہیں دتا: شیریں مزاری
اسلام آباد: وفاقی وزیر برائے انسانی حقوق شیریں مزاری آکھیا اے مسئلہ کشمیر تے ساڈے اداریاں خصوصاً وزارت خارجہ نے وزیراعظم عمران خان دا پورا ساتھ نہیں دتا۔ سپیکر اسد قیصر دی زیر صدارت قومی اسمبلی دا اجلاس ہویا جہدے وچ مسئلہ کشمیر تے بحث ہوئی۔
شیریں مزاری نے اظہار خیال کردیاں آکھیا ایہ کہنا غلط اے کہ حکومت نے کشمیرتے کجھ نہیں کیتا، حکومتی کوششاں نال اقوام متحدہ دے سیکرٹری جنرل دے کئی واری کشمیر دے حوالے نال بیانات آئے، سلامتی کونسل دا اجلاس ہویا، یورپی یونین نے بھارتی اقدامات دی مذمت کیتی، آزاد کشمیر وچ اقوام متحدہ دی امن فورس موجود اے، سانوں مقبوضہ کشمیر وچ وی اقوام متحدہ دی امن فورس تعینات کرن دا مطالبہ کرنا چاہیدا اے۔
شیریں مزاری دا کہنا سی وزیراعظم عمران خان نے جہڑے بھرپور طریقے نال مسئلہ کشمیر نوں اجاگر کیتا اے، بدقسمتی نال ساڈے اداریاں خصوصاً وزارت خارجہ نے وزیراعظم دی کوششاں وچ اینی مدد نہیں کیتی جنی اوہ کر سکدے سن، دفتر خارجہ نے کئی چیزاں تے ایکشن نہیں لیا جتھے کشمیر دا موقف پیش کر سکدے ساں، صرف بیانات کافی نہیں سگوں دفتر خارجہ نوں ایہدے توں ودھ کجھ کرنا ہووے گا تے سفارتکاری دی روایتی پالیسی توں اگے ودھنا ہووے گا۔ وزیراعظم مسئلہ کشمیر نوں بہت اگے لے گئے نیں پر باقی اداریاں دی مدد وی بہت ضروری اے جہنوں ہور ودھانا چاہیدا اے جو اوہ ایس ویلے نہیں کر رہے۔
