بلاول بھٹو زرداری دا مارچ وچ مہنگائی دے خلاف تحریک شروع کرن دا اعلان

کراچی: چیئرمین پیپلزپارٹی بلاول بھٹو زرداری نے مہنگائی دے خلاف تحریک شروع کرن دا اعلان کردیاں آکھیا اے 50لکھ گھراں دا وعدہ کرن والے اک وی نہیں بنا سکے، الٹا لکھاں بندیاں توں چھٹ کھوہ لئی، پی ٹی آئی ایم ایف بجٹ توں غربت تے بیروزگاری ودھی، عوام دا جینا دوبھر ہو گیا۔

بلاول بھٹو دا کراچی وچ خطاب کردیاں کہنا سی مطالبہ کرنا آں حکومت آئی ایم ایف دے نال دوبارہ مذاکرات کرے۔ آئی ایم ایف پیکیج وچ پاکستان تے عوام دے حقوق تے سودے بازی نہیں ہونی چاہیدی۔ حکومت نوں پاکستان دے حق وچ پیکیج لینا پوے گا۔ اوہناں نے الزام لاگو کیتا حکومت غریب عوام توں بے نظیر انکم سپورٹ پروگرام کھوہ رہی اے۔

وزیراعظم نے اک کروڑ نوکریاں تے 50لکھ گھر بنان دا وعدہ کیتا سی پر اک ورھے وچ روزگار کھویا تے لکھاں گھر ڈیگے گئے۔ چیئرمین پیپلزپارٹی آکھیا مہنگائی دا بھار غریب عوام چک رہے نیں۔ حکومت عوام دے معاشی حقوق کھون دی کوشش کر رہی اے۔ عوامی حکومت بنان لئی مینوں تہاڈا ساتھ چاہیدا اے۔

انشاء اللہ اسیں عوامی حکومت بنا کے مسئلیاں نوں حل کراں گے۔ اسیں عوام دے معاشی حقوق دا دفاع کراں گے۔