مودی بہت وڈی غلطی کر بیٹھا، میرا ایمان اے کشمیر آزاد ہووے گا: وزیراعظم
مظفر آباد: وزیراعظم عمران خان آکھیا اے مودی 5اگست نوں بہت وڈی غلطی کر بیٹھا اے، میرا ایمان اے کہ کشمیر آزاد ہووے گا، وعدہ کیتا سی کہ میں کشمیر دا سفیر بناں گا۔
وزیراعظم عمران خان نے آزاد کشمیر قنون ساز اسمبلی نال خطاب کردیاں آکھیا میں جمہوریت پسند آں، جمہوریت پسند اقتدار لئی نہیں آں، جمہوریت جنی وی بری ہووے فیر وی بہترین نظام اے، مغرب ساڈے توں اگے ایس لئی اے کیوں جے اوتھے جمہوریت پہلاں آئی، جنی جمہوریت ودھے گی اونی خوشحالی آوے گی، جتھے بادشاہت سی اوہ معاشرے پچھے رہ گئے، خوشحالی ملکاں دے کول شفاف نظام اے۔
عمران خان دا کہنا سی میری کسے نال کوئی ذاتی دشمنی نہیں، ملک لٹن والیاں نال مفاہمت دا نہ کہو، میرے گھر توں کوئی چوری کرے کیہ میں اوہناں نوں چھڈ دیواں؟ خوشحالی دی سب توں وڈی وجہ شفافیت تے کرپشن توں پاک معاشرہ اے، ایہ ذاتی نہیں، میرے ملک دی لڑائی اے، چین نے 450وزیراں نوں جیلاں وچ سُٹیا، جہڑے ادارے ول ویکھو خسارے وچ اے، اپنے اندر کدی مایوسی نہ لیاؤ، ایہ گناہ اے۔
وزیراعظم نے ہور آکھیا مودی نے ساری انتخابی مہم پاکستان دے خلاف کیتی، مودی نے ہندو توا فلاسفی نوں پروان چڑھایا، مسئلہ کشمیر اجاگر کرن لئی ہر فورم دا استعمال کیتا، ڈونلڈ ٹرمپ نوں سمجھایا کہ کشمیر ایشو کیہ اے؟
مودی آر ایس ایس دے نظریے نوں اُتے لیایا، آر ایس ایس ہٹلر توں متاثر سی، آر ایس ایس نے یہودیاں دے قتل عام نوں سراہیا، اسیں لوکاں نوں دسیا کہ آر ایس ایس دا فلسفہ کیہ اے۔وزیراعظم دا کہنا سی دہشت گردی نوں اسلام نال جوڑ دتا جاندا اے، ہندو، یہودی دہشت گردی دا کدی کسے نے آکھیا؟
بھارت عالمی برادری دی توجہ ہٹان لئی فالس فلیگ آپریشن کر سکدا اے، دین تے دہشت گردی دا کوئی تعلق نہیں، کشمیر ایشو نوں ہن اگلے مرحلے وچ لے کے جانا اے، یورپی پارلیمنٹ وچ 600پارلیمنٹرینز نے قرارداد پاس کیتی۔
