مودی دی حکومت وچ جنگ دا خطرہ اے: شیخ رشید
راولپنڈی: وزیر ریلوے شیخ رشید دا کہنا اے مودی دی حکومت وچ جنگ دا خطرہ اے۔ لال حویلی دے باہر کشمیریاں نال اظہار یکجہتی جلسے نال خطاب کردیاں شیخ رشید دا کہنا سی اسیں کشمیر دے بچے بچے دے نال آں تے کشمیر ساڈا اے۔
اوہناں آکھیا کشمیر نوں باقاعدہ ڈیزائن دے نال وکھرا کیتا گیا، سانوں جنگ نہیں دانشمندی دی لوڑ اے پر جے جنگ ہوئی تے آخری ساہ تک لڑاں گے۔ اوہناں دا کہنا اے بھارت دے شہریت بل تے جہڑا چپ اے اوہ ملک دا غدار اے، خواہش اے کشمیر بھارت دے چنگل توں آزاد ہووے تے پاکستان دی بانہہ بنے۔
شیخ رشید آکھیا میں محبت دا بھوکا آں، مینوں وزارت دا شوق نہیں صرف عمران خان دے نال آں۔ اوہناں آکھیا مہنگائی اے، میں عوام دے مسئلیاں وچ تہاڈے نال آں، مینوں احساس اے اج غریب گیس بجلی دا بل دے نہیں سکدا۔
اوہناں دا کہنا اے کجھ لوک مارچ وچ مارچ کرن دا اعلان کر رہے نیں پر چنگے برے ویلے وچ عمران خان دے نال آں۔بھارتی وزیراعظم نوں تنقید دا نشانہ بناندیاں وزیر ریلوے آکھیا مودی دی حکومت وچ جنگ دا خطرہ اے، مودی دے کول اوہدی ولدیت دا سرٹیفکیٹ نہیں ہووے گا۔
