کشمیر دے معاملے تے انسانی حقوق دے چیمپئن چپ بیٹھے نیں: شہریارآفریدی
راولپنڈی: وزیر مملکت برائے انسداد منشیات شہریار آفریدی دا کہنا اے دنیا بھر وچ انسانی حقوق دے چیمپئن چپ وٹے بیٹھے ہوئے نیں۔
راولپنڈی وچ یوم یکجہتی کشمیر دی تقریب نال خطاب کردیاں شہریار آفریدی آکھیا کشمیر تے اقوام متحدہ وچ گل ہوئی پر اوہ چپ اے، مودی دے کشمیر وچ انسانیت سوز مظالم نوں دنیا دی توجہ نہیں ملی، اج دنیا دی ادھی توں ودھ آبادی ساڈے خطے وچ رہندی اے، اج دا دور ایٹمی جنگ دا اے جہدے چھڑن تے 14دناں وچ دنیا ختم ہو جاوے گی۔
اوہناں آکھیا دنیا بھر وچ انسانی حقوق دے چیمپئن چپ وٹے بیٹھے ہوئے نیں، کشمیر دے نہتے مظلوم عوام دے نال کھڑا ہونا ویلے دی لوڑ اے، بھارتی اداکار وی اج گل کردے نیں کہ جناح ٹھیک گل کر دے سن۔ وزیر مملکت دا کہنا سی عمران خان نے آر ایس ایس تے مودی نوں دنیا بھر وچ بے نقاب کیتا، مودی دی پالیسیاں ای بھارت دی دشمن اے اوہناں نوں دوجے دشمناں دی لوڑ نہیں، بھارت وچ مسلماناں نوں اوہناں دا حق ملے گا تے کشمیرنوں حقیقت بنایا جاوے گا۔
