مسئلہ کشمیر تے حکومت عالمی عدالت انصاف نہ گئی تے بطور پرائیویٹ پٹیشنز چلے جاواں گے: رحمان ملک

اسلام آباد: قائمہ کمیٹی برائے داخلہ دے چیئرمین رحمان ملک دا کہنا اے کشمیر دے معاملے تے حکومت ہن جے عالمی عدالت انصاف نہ گئی تے اسیں پرائیویٹ پٹیشنز دے طور تے جاواں گے۔

قائمہ کمیٹی داخلہ دے چیئرمین رحمان ملک دا کشمیری حریت رہنماواں دے نال پریس کانفرنس کردیاں کہنا سی کشمیر وچ لوک 6مہینے توں ودھ کرفیو وچ نیں۔ پاکستان نوں ہن جارحانہ انداز اپنانا چاہیدا اے۔

ساڈی مسلم امہ کدوں جاوے گی، ایہ اوہ ویلا اے جدوں کشمیریاں تے ظلم سب توں ودھ ہو گیا اے۔

رحمان ملک دا کہنا سی اج دا دن کشمیری بھین بھراواں دے نال یکجہتی دے اظہار تے اوہناں دے درد نوں محسوس کرن دا دن اے، بہادر کشمیری شہیداں نوں سلام تے حریت رہنماواں نوں خراج تحسین پیش کرنے آں، ہن ویلا آ گیا اے پاکستان وی مظلوم کشمیریاں دا مقدمہ عالمی عدالت انصاف وچ لے جاوے، دنیا دا غریب ملک گیمبیا تے آئی سی جے وچ جا سکدا اے پر پاکستان اپنے کشمیری بھین بھراواں لئی کیوں نہیں۔