پوری قوم یک زبان، کشمیر بنے گا پاکستان، کراچی تا خیبر یکجہتی ریلیاں تے مظاہرے

اسلام آباد: ملک دے وڈے شہراں دی طرح نکے شہراں وچ وی یوم یکجہتی کشمیر منایا گیا۔ کشمیری بھراواں نال اظہار یکجہتی لئی اسلام آباد، لہور، کراچی سنے نکے وڈے شہراں وچ ریلیاں کڈھی گئیاں۔

پاکستان تے آزاد کشمیر نوں ملان والے پلاں تے انسانی ہتھاں دی زنجیر بنائی گئی۔ 10وجے سائرن وجائے گئے، اک منٹ لئی خاموشی اختیار کیتی گئی۔

بشام شہر وچ کڈھی گئی ریلی وچ سکول دے بچے تے عام لوک شریک ہوئے۔ راولاکوٹ دے ڈھلکوٹ تے آزاد پتن پل تے انسانی ہتھاں دی زنجیر بنائی گئی۔

بھمبر آزاد کشمیر وچ سیکڑاں بندیاں نے بھارت دے خلاف احتجاج کیتا۔ ظاہر پیر وچ کڈھی گئی ریلی وچ پاک فون زندہ باد، کشمیر بنے گا پاکستان دے فلک شگاف نعرے لگے۔

شیخوپورہ دا ضلع کونسل ہال کشمیر بنے گا پاکستان دے نعریاں نال گونج اٹھیا۔ اوکاڑہ دیاں سڑکاں وی کشمیر بنے گا پاکستان دے فلک شگاف نعریاں نال گونج پئیاں۔ قصور دی ریلی وچ سینکڑاں طلباء تے شہریاں نے رلت کیتی، مظاہرین نے انڈیا دے خلاف نعرے بازی کیتی۔

گجرات وچ پاکستان تے آزاد کشمیر دے قومی ترانے وجائے گئے۔ ننکانہ صاحب دی ریلی وچ ڈی پی او نے کشمیر بنے گا پاکستان دے نعرے لائے۔ رحیم یار خان دی ریلی وچ پاک فوج دے حق وچ نعرے بازی کیتی گئی۔ میانوالی وچ نجی سکول دے طلباء و طالبات تے ٹیچرز نے ریلی کڈھی۔

اٹک تے کرک وچ جماعت اسلامی دے زیر اہتمام ریلی کڈھی گئی۔ پیر محل وچ طلباء نے ریلی کڈھی تے کشمیریاں دے حق وچ نعرے بازی کیتی۔

بہاولپور وچ ریسکیو 1122دے افسران و عملے نے ریلی کڈھی۔

نوشہرہ وچ شوبرا چوک توں خیر آباد تک ہتھاں دی زنجیر بنائی گئی۔

ڈیرہ بگٹی، خان پور، اوچ شریف، کشمور، ڈی جی خان، پاکپتن، ٹھٹھہ، سکردو، صادق آباد، وہاڑی، راجن پور، شکار پور، لیاقت پور، چشتیاں، مردان، شگر، شجاع آباد وچ وی کشمیریاں نال بھرپور اظہار یکجہتی کیتا گیا۔